مابنسمعش أغانيها.. بنات شيرين يصدمن والدتهن ويكشفن أسرارا خاصة عنها لأول مرة
![شيرين عبد الوهاب](images/no.jpg)
قالت الفنانة شيرين عبد الوهاب: "مريم وهنا أحسن حاجة استثمرت فيها السنوات اللي فاتت، وثمرة حياتي".
ابنة شيرين تكشف طباعها في المنزل
ولفتت مريم ابنة شيرين خلال لقائها ببرنامج "صاحبة السعادة" الذي تقدمه الفنانة إسعاد يونس بقناة "دي إم سي": "أنا في 3 إعدادي ولما أدخل ثانوي النيو فورم مش هيتغير، وماما كريمة جدًّا وطيبة جدًّا وبتحب الفانز بتاعها كتير ومنظمة، بتدلعنا جامد، ولو عملنا حاجة معجبتهاش بتزعق ساعات وبتخاصمنا، بسمع ماما في الاستديو بتاعها اللى في البيت"، لترد شيرين: "بعاملهم زي إخواتي".
شخصية شيرين عبد الوهاب
كما أضافت هنا الابنة الأخرى لشيرين: "أنا في أولى إعدادي، ماما شخصية قوية جدًّا، وبتحب النظافة، ماما جميلة ومش مزيفة وجميلة من جوا زي من برا، وقوية وعندها ثقة في نفسها، وبتغني لنا في البيت، ومش بنسمع كل أغانيها ومش عارفة اسم أغانيها".
شيرين تصف ابنتيها
وأوضحت شيرين: "بناتي الاتنين شاطرين، بس مريم شاطرة جدًّا وطالعة زيي بتحب الشيكولاتة والرسم، وهنا دايمًا بتقول مواعظ وحكم وبتدي طاقة إيجابية وساعة لما أعلنت إني هعتزل هي اللي خلتني أواجه وأخرج من مشكلتي وهروبي من الناس".
وقالت الفنانة شيرين عبد الوهاب في نفس اللقاء: "كنت بغسل دماغي في الحمام 8 مرات وكل ما الصابون يخلص أحط تاني، دلوقتِ لما حلقت شعري مبقتش اتعب من الموضوع ده".
فرصة أمل لمحاربات السرطان
وتابعت: "ربنا يجبر بخاطر كل الناس ويستر عرض كل البنات، ومحنتي الأخيرة جت أمل بالنسبة لمحاربات السرطان وبقول لهم احنا لا نقل أنوثة عن أي حد، وبتمنى ربنا يشفي كل مرضى السرطان".
تصدير طاقة إيجابية
وأضافت شيرين: "أنا نفسي الناس تحس قد إيه احنا كستات جامدين جدًّا وقد ما بنصبر وبنشيل بنعطي طاقة حلوة في وقت ممكن نكون احنا محتاجين الطاقة الحلوة دي".
قيمة شيرين بعد الطلاق
ولفتت: "بقيت عارفة قيمة نفسي بعد أزمة الانفصال وحابة نفسي اليومين دول، بعد أزمتي اتدفيت أوي بحضن الناس اللي بتحبني ووقفوني علي رجلي تاني".
حفل شيرين في الإمارات
وأشارت: "بعد حفلتي الأخيرة في الإمارات شُفت في عيون الناس إنهم مبهورين بصوتي وغنايا مش بشكلي، ولما شُفت رسائل محاربي مرض السرطان اتطمنت وفرحت أوي".
وأكملت: "لما طلعت المسرح في حفل الإمارات كنت خايفة من ردود أفعال الناس ولكنهم طمنوني وحضنهم دفاني أوي، ومش عايزة حد يقلدني في حلق شعري لأن ده وراثة وأبويا كان بيعمل كده".
شيرين عبد الوهاب ضيفة إسعاد يونس
وتحل النجمة شيرين عبد الوهاب ضيفة على إسعاد يونس في برنامجها صاحبة السعادة، في حلقة خاصة للاحتفال بليلة رأس السنة الميلادية 2022، حيث سجلت المطربة المصرية مؤخرًا حلقتها التي تظهر فيها بشكلها الجديد الذي فاجأت به جمهورها مؤخرًا.
أول ظهور إعلامي لشيرين عبد الوهاب
ويعد ذلك أول ظهور إعلامي في برنامج تليفزيوني لشيرين عبد الوهاب بعد طلاقها من حسام حبيب، وإعلانها عودتها القوية إلى عالم الفن، لتواصل مسيرتها الفنية الناجحة التي بدأتها بانطلاقة قوية مع محمد محيي، في ديو بحبك عام 2001 من ألبوم صورة ودمعة.
بوستر أغنية شيرين
وعلى جانب آخر، كشفت شيرين عبد الوهاب عن بوستر أغنيتها السادسة، من ألبومها الجديد، والذي عادت به بقوة إلى جمهورها، بعد سنوات طويلة من الغياب، وعقب انفصالها عن زوجها الفنان حسام حبيب.
وتصدر مؤخرًا اسم المطربة شيرين عبد الوهاب محركات البحث، واحتل تريند مواقع التواصل الاجتماعي بعد ظهورها حليقة الرأس، في حفل غنائي أحيته في أبوظبي، وكشفت النجمة أنها فعلت ذلك بسبب التعنيف النفسي الكبير، والاكتئاب التي تعاني منه، بعد طلاقها من حسام حبيب.
وحققت أغنية المطربة شيرين عبد الوهاب الأخيرة بعنوان “وبحلفلك”، نجاحًا كبيرًا منذ طرحها قبل أقل من 24 ساعة عبر قناة شيرين الرسمية على موقع الفيديوهات الشهير “يوتيوب”.