مناخوليا.. أحلى من الشرف مفيش
حاجه تجنن.. حاجه تخبل.. حاجه تطير العقل.. حاجه آخر مناخوليا.. هى الناس جرالها إيه.. بتاكل فى بعضها ليه.. عميد كلية مرتشى.. نائب محافظ حرامى.. مدرس مغتصب لتلميذاته.. أنواع كتير من الجرائم على كل لون نسمعها ونراها ونقرئها ليل نهار.. وربنا يكون فى عون الرقابة الإدارية اللى مش ملاحقة على كشف الفساد هنا وهناك.. وانا مش عارف دا كله ليه وعشان إيه.. وسعادة البيه المرتشى دا ناقصه إيه.. والله مانا عارف أقول إيه ولا إيه.. وحاسس إن المناخوليا محوطانى يا سعادة البيه.. والمصيبة إن كل المرتشين مهماش محتاجين.. لأ وكمان رافعين شعار أحلى من الشرف مفيش
طب هل هناك بعد الكورونا اللى بتقتل فى أهالينا أى حاجه ممكن نتعظ بيها ونعرف ان الدنيا دى مش مستاهله نغش بعض؟!.. انا مش عارف!
حتى حتة الجبنة اللى بياكلها الغلبان بتغشوها يا عالم يا مناخوليا؟!
واللى يجننك _أو يجننى انا يا سيدى علشان متزعلش_ إن مصنع الجبنة المغشوشة موجود فى الفلاحين.. يعنى ماهواش فى البندر مثلا علشان نقول عادى.. لأ دا بيتغش فى الفلاحين وييجى البندر وأهل البندر بيستهلكوه على انه حاجه كدا آخر لزازة.. حاجة بيور من على أبوها.. حاجة أول قطفة.. من الجاموسة لبوقك بتدوب دوب
ربنا يكون فى عون صحتكم يا مصريين.. 37 طن من الجبن الفاسد يتم ضبطهم فى مصنع ألبان بمركز "تلا" بالمنوفية.. عبارة عن قليل من اللبن مضاف إليه معجون طلاء الحوائط وملح فاسد منتهى الصلاحية.. وحاجة كدا تستاهل كرشك يا مؤمن
ده الواحد مننا ممكن يكون أكل جبنة تشطب عمارة وهو مش واخد باله.. فعلا صدق اللى قال: معدة المصريين بتهضم الزلط.. وطبعا دى كانت آخر قضية مضبوطات قرأت عنها.. ولسه معرفش نتايج التحقيق هتكون إيه ويارب تكون المعلومات دى كلها غلط مش صح علشان انا بقيت آخر مناخوليا
لذلك أنا مش هكلمكم على لحوم الحمير أو العصائر المصنوعة من الفاكهة المضروبة علشان دى كلها حاجات بقت عادية بالنسبالى وبالنسبالكم وسلمولى على المناخوليا!
