الرئيس السيسي في قنا.. يفتتح مشروعات قومية بالصعيد.. ويوجه رسائل للحكومة والقطاع الخاص والمواطنين

افتتح الرئيس عبدالفتاح السيسي اليوم من محافظة قنا سلسلة من المشروعات القومية الجديدة بمختلف القطاعات بصعيد مصر.

كما تفقد الرئيس السيسي عددا من المشروعات القومية الجديدة بصعيد مصر كما استمع لعروض وشروح تفصيلية عن العديد من تلك المشروعات.

وقال السفير بسام راضي المتحدث الرسمي باسم رئاسة الجمهورية إن افتتاحات المشروعات القومية اليوم تأتي ضمن فاعليات "أسبوع الصعيد" في إطار جهود الدولة لتحقيق نهضة تنموية وخدمية متكاملة لأهل الصعيد، وتوفير فرص عمل مباشرة وغير مباشرة، حيث تتضمن الافتتاحات عددا من المجمعات الصناعية والمحاور والطرق لا سيما المحاور العرضية على نهر النيل.

وقال الرئيس عبد الفتاح: دفعنا 6 مليارات جنيه لترفيق 20 منطقة صناعية في الصعيد.. وكنا قلنا الترفيق وطرح أراضى للناس هيطول عن المسار المطلوب.. والمسار البديل نعمل المجمعات الصناعية".

وأضاف: "أصل الموضوع مش إنشاءات بس.. تم تجهيز العاملين وفق تدريب فنى متقدم.. ليه ادفع 6 مليارات لما اعمل بيهم 5 مجمعات أخرى جديدة".
وقال الرئيس السيسي: " مش هقول للمواطن اجرى خلص ورقك.. انا عاوز أكون موجود معه.. فيه إجراءات بيروقراطية بيعملها المواطن.. قلنا ادوا للمواطن الحاجة خالصة.. اسألوه هو عاوز يشتغل في ايه والترخيص في ايه.. بقولوا تعالى الحاجة بتاعتك جاهزة بتمويل منخفض التكلفة من البنك.. وهنقدر نساعدك إزاى في تسويق المنتجات".

كما وجه الرئيس  السيسي، بتقنين أوضاع المصانع غير المرخصة، قائلا: " الهدف اشرعنه واقنن وضعه".

كما قال الرئيس السيسى، عن إنشاء 3 مدن صناعية جديدة وهى مدينة الروبيكى ومدينة الأثاث ومدينة النسيج،  " المسار النظرى لما ننفذه على الأرض ياخد وقت كتير.. لو اقتحمنا كل مرحلة من المراحل دى.. هنطمن أن المستهدف يمكن تحقيقه".

وأضاف الرئيس السيسى: "الروبيكى فكرة موجودة من عام 2004.. والان معانا 825 ألف مشروع يعنى هتستفيد بيه 825 ألف أسرة".

وقال الرئيس السيسي: “معندناش مشكلة إن إحنا نعمل والناس تشتغل.. محبش أفرق فلوس على الناس ده كلام مش مظبوط.. عاوز المواطن يكبر ويثق في نفسه ويكون عنصر داعم للاقتصاد المصرى.. مش عاوز أديله السمكة عاوزه يصطاد".

كما وجه الرئيس السيسي بمساعدة النماذج الناجحة وغير الناجحة، قائلا:"اللى ينجح أكتر نساعده أكتر.. واللى مينجحش نساعده أيضا".

وقال الرئيس السيسي: "لسه المشوار مخلصش.. التطوير والتحديث مبينتهيش.. فيه الدعم الفني بمدارس ومكاتب استشارية".
وأكد الرئيس السيسى، أن الدولة تنفذ نموذجا جيدا خلال العمل في مجال الصناعة، وقال:" الروبيكى نموذج قابل للنجاح في ظل التطور الكبير الذى يشهده العالم.. بقول الكلام ده للناس اللى شغالة في الصناعة.. لازم نعمل حاجة قابلة للنجاح.. التطور مش في مصر بس.. ده في الدنيا كلها.. حد هيجى يقولك الاشتراطات البيئية انت عامل فيها ايه.. فيه كلام كتير".

وأضاف الرئيس السيسى: "ممكن البضائع كويسة ويصعب إنفاذها في الأسواق الخارجية.. تجربة الروبيكى ما نجحتش إلا لما الدولة تدخلت.. جاء المهندس طارق قابيل وزير الصناعة وقتها- قالى مش قادرين ننقل الناس.. انقل الناس على حسابنا.. قولتله ننقلهم على حسابنا.. قولتله ماشى.. ودفعنا 100 مليون جنيه على حسابنا".

وقال الرئيس السيسى: "بنديله المكان اللى قاعد فيه وكل حاجة.. بناخد الناس على قد تجربتهم.. انا شايف الصح وصاحب المصلحة أن البلد تطلع قدام.. والناس تغنى ويبقى عندها طاقات، وعمر الصناعات البسيطة ما تعمل غنى".

كما طالب الرئيس السيسي بالاهتمام بالصناعات التكنولوجية المتقدمة، قائلا: "الناس اللى بتشتغل في التكنولوجيات المتقدمة.. اليوم بتاعها بـ 10 آلاف و20 ألف جنيه كمان.. اليوم مش الشهر.. مش الاشغال البسيطة".

وشدد على أن المجمعات الصناعية الجديدة يجب أن تكون جاهزة بشكل كامل من ناحية توفير الكهرباء والمياه والغاز، وقال الرئيس السيسي: "العدادات تكون راكبة موجودة.. علشان اللى يدخل المجمعات دى ميعملش حاجة تانية.. وحتى المساكن اللى بنعملها لازم يكون فيها كهرباء وغاز ومياه.. وتحركنا كده ولما شوفنا النجاح في الروبيكى.. قلنا نكمل ونعمل منشأت تانية".

وقال الرئيس السيسي: "إننا نستهدف تحقيق الاكتفاء الذاتي للسوق المحلى.. لما ألبس قميص من مصر وكل المستلزمات الأخرى بكده بمستوى بره يبقى كده وفرت فرص عمل وعُملة صعبة وزودت الناتج المحلى".

وأضاف الرئيس السيسي: “نرجع لتجربة تانية بتاع مدينة الأثاث عملنا نفس الكلام، لكن تحرك الناس من دمياط لمدينة الأثاث مكنش بالسرعة اللى إحنا عاوزينها، فيه حاجة عندنا المفروض كنا وفرلنالهم منشآت ومستلزمات الخشب.. صرفنا مليارات ومُصرين على النجاح مش علشان ننجح فكرتنا.. المنتج المحلي منتج كويس، وقد يكون قوى، لكن يحتاج المنافسة بيه داخل وخارج مصر”.

وقال الرئيس: "يجب على المصّنع التطوير، وهنساعدك ولو محتاجين نجيبله ناس من بره تطور الأذواق مستعدين..اوعوا تفتكروا وإحنا بنعمل منطقة صناعية مستنيين حاجة، الـ 10 مليار لو موجودين في البنك ها يجيبوا مليار جنيه.. تفتكروا إيجارات المجمعات هتجيب كده".

كما تحدث الرئيس السيسي، عن أهمية مشروع مثل مشروع مدينة الروبيكى، قائلا: “عندنا 825 ألف مشروع في الروبيكى.. لو المشروع به شخص على الأقل.. يعنى 825 ألف أسرة هتستفيد”.

وأضاف الرئيس السيسي: "الهدف إيه.. كتير مننا نلاقى بنعمل تجمعات جنب محطات الوقود.. وكتير يقولك ده كتير ده ومش بيجب فلوس.. وأنا أقول اعمل ده.. ويقولى ده مش بيجب فلوس.. أقوله فيه ناس بتشتغل؟ يقولى: اه.. خلاص ده الفلوس.. أن الراجل ده يشتغل ويرجع بيته ويكون فيه فلوس ده المطلوب.. إذا كانا بنتلكم عن فقر وبطالة.. الحل إننا نشتغل كويس".

وقال الرئيس السيسي:"الناس اللى شغالة مع الدولة ناس جدعان أوي"، مشيرا إلى الأتفاق على عمل عدد من الكباري بمحافظات الصعيد مع دفع نسبة 25% من التكلفة لحين الإنتهاء من تلك المشروعات.
كما وجه الرئيس السيسي القوات المسلحة ووزارة الداخلية بمنع الإنشاء والبناء على جانبي المحاور الجديدة بالصعيد.

كما وجه الرئيس السيسي بإنشاء مناطق تنموية على طول المحاور والطرق الجديدة ومنها محطات التموين وتقديم الخدمات وقال: "المليارات زى الكوتشينة".

كما طالب الرئيس السيسي القطاع الخاص بالمشاركة في جميع مشروعات الدولة المصرية.

وشدد عن على انه لا يمنح هدايا لأحد وقال: "أنا أعمل الشغل..أنا ما بهاديش حد.. وما بديش حد فلوس".
وأضاف الرئيس السيسى: "أنا اسف أقول كده.. بخاف الناس تتعدى وتبني على المحاور دى.. ادرسوا الموضوع ده.. كل المحاور الجديدة يجب الحفاظ عليها من البناء.. نمنع الإنشاء على جانبي هذه المحاور بعمق كيلو.. اللى بانى خلاص.. الوضوع القائم مش يتغير.. المسئول عن ده القوات المسلحة ووزارة الداخلية".

كما شدد الرئيس السيسي، على ضرورة دعم القطاع الخاص للمشروعات التي يتم تنفيذها داخل الدولة المصرية، متابعا: "محتاجين دعم القطاع الخاص.. زى ما قولت تانى مرة وتالت ورابع.. من فضلكم خشوا معانا.. والشركات اللى شغالة في كل المشروعات التانية.. مش عاوز أقول كلمة تكون مش لطيفة يعنى.. هتبقى مش لطيفة لو قولت الجيوب اتملت.. هتبقى كلمة مش لطيفة.. الحاج سعيد والمهندس هانى.. الجيوب مش اتملت يعنى".

وأضاف الرئيس السيسى: "متشكرين.. شكرا جزيلا"، مداعبا الشركات المسئولة عن تنفيذ محورين جديدين بالصعيد: "اومال عاوز تاخد 25 % منى ليه؟!".

وقال الرئيس السيسي، إن الهدف من إنشاء مناطق خدمات "تنموية"، على الطرق هو تحقيق السيطرة الأمنية، متابعا: "كل 20-25 كليو يكون فيه منطقة.. وده اللى بقوله على طريق زى كده.. كل 25-30 محطة خدمة "منطقة تنموية".. في بعضها مش هيكون اقتصادى.. تكلفة الإنشاء قليلة.. لو حد عاوز يعملها لوحده.. هتكلف تلت أو نص الثمن.. ده هيعوض ده.. وده مش حكر على حد".

وأضاف الرئيس السيسى: "بقول لازم الصناعات المرتبطة للشركات اللى شغالة معانا تتطور.. بقول وقلت الكلام.. الناس في مشروعات إنشاءات وبنية أساسية.. المحفظة بتاعتك نوعها.. نوعها مثل الحواجز والفواصل الخاصة بالكبارى.. القائم ايه والموجود بالفعل ايه وعندنا فرصة قد ايه وده ممكن من خلال وزارة الصناعة.. الإنشاءات مستمرة.. ودايما امداد للمشروعات.. تنوع العمل اللى بيتعمل".

كما أكد الرئيس السيسى، أن الفريق كامل الوزير تحدث عن مشروعات وزارة النقل ولم يتكلم عن كافة المشروعات الخاصة في القطاعات الأخرى سواء هيئة المجتمعات العمرانية أو الهيئة الهندسية في أماكن أخرى، متابعا: "بقول للى بنتكلم فيه في الصعيد بس.. 1.6 تريليون جنيه للنقل بس.. أبو قير فيه أرصفة جديدة حوالى 6-7 كيلو بعمق 22 مترا على سبيل المقال.. مشروعات وزارة النقل حجمها كبير".

وأضاف الرئيس السيسي: "حجم أخر لم يذكر هنا.. ومش هقول المفروض أنه يقولهم.. بقول حجم العمل اللى بيتم في مصر في كافة القطاعات.. 1.6 تريليون.. 1600 مليار.. في كل القطاعات.. الدكتور مصطفى مدبولى بيقولى 6.2 تريليون جنيه.. 6 آلاف مليار و200 مليون ولسه شغالين".

وقال الرئيس السيسى: "الحاجة الأخيرة.. المحافظين على القطاعات دى وعلى أجانب الطرق خاصة في المحاور الجديدة..  انتبه لعدم التعدى.. الحركة بقت سهلة.. يقولك ابنى جنب الطريق الجديد.. وانا جاى بالطائرة.. شايف الطرق الصحراوية شرق وغرب فاضية.. نبنى عليها وتتحرك 2 كيلو لأرضك الزراعية.. وبوجه كل الشكر لكل ساهم في المشروعات.. نتحرك بقوة في كافة المجالات".

كما شدد الرئيس السيسي، على ضرورة دعم القطاع الخاص للمشروعات التي يتم تنفيذها داخل الدولة المصرية

وقال الرئيس  : "محتاجين دعم القطاع الخاص.. زى ما قولت تانى مرة وتالت ورابع.. من فضلكم خشوا معانا.. والشركات اللى شغالة في كل المشروعات التانية.. مش عاوز أقول كلمة تكون مش لطيفة يعنى.. هتبقى مش لطيفة لو قولت الجيوب اتملت.. هتبقى كلمة مش لطيفة.. الحاج سعيد والمهندس هانى.. الجيوب مش اتملت يعنى".

كما جاءت أبرز الرسائل:

- تخفيف إجراءت تسليم المجمعات الصناعية وتذليل العقبات

- دمج الصناعات والأعمال غير المقننة في سوق العمل  ودراسة تقنين أوضاع المصانع غير المرخصة

- دراسة مدى ملائمة ما تم تنفيذه لخطط ومسار تنفيذ المجمعات الصناعية.

- توفير فرص العمل ورفع معدلات التشغيل هدف رئيسي ضمن مسار تنفيذ المجمعات الصناعية

- نستهدف في المرحلة الحالية  تحقيق الاكتفاء الذاتي للسوق المحلية

- عملية التحديث والتطوير ما بتنتهيش..المشوار لسه طويل وما خلصش لسه

- معندناش مشكلة..نعمل والناس تشتغل ومحبش أفرق فلوس على الناس.. مش عاوز أديله السمكة عاوزه يصطاد

- الروبيكى فكرة موجودة من عام 2004....لكن امتى المدنية تدخل الإنتاج الحقيقى

- أنا شايف الصح وصاحب المصلحة أن البلد تطلع قدام

- توفير الكهرباء والمياه والغاز للمجمعات الصناعية الجديدة..وصناعات مرتبها فى اليوم يصل لـ 20 ألف جنيه

- عاملين الكبارى طبقا للمواصفات وزى الفل

- هدفنا الناس تشتغل وترجع بيوتها بفلوس

- الناس اللى شغالة مع الدولة جدعان أوي

- يأمر القوات المسلحة والداخلية بمنع الإنشاء والبناء على أجناب المحاور الجديدة بالصعيد

- المليارات زى الكوتشينة موجها بعمل مناطق تنموية على طول المحاور والطرق الجديدة

- طالب  القطاع الخاص بالمشاركة في جميع مشروعات الدولة المصرية

- أنا ما بهاديش حد..وما بديش حد فلوس.. أنا أعمل الشغل