الخواجة لازم يمشي.. رسائل الجماهير الحزينة لكيروش بعد هزيمة منتخب مصر
حالة من الحزن خيمت على جماهير الكرة المصرية لخسارة منتخب مصر أمام قطر بضربات الجزاء، ووصول مصر للمركز الرابع في بطولة كأس العرب 2021، المقامة في قطر.
وطالب النشطاء بإقالة المدرب البرتغالي كارلوس كيروش من تدريب المنتخب، بعد هزيمة المنتخب أمام قطر.
الخواجة لازم يمشي
قال الفنان نبيل الحلفاوي "الخواجة رجع شريف راس حربة ونزل رفعت وما هانش عليه يكمل التشكيلة فما نزلش أكرم وقفشة وحجازي. لا تعليق."
ورد كوردي قائلًا: "اعتقد كمان أن الجهاز المعاون ملوش أي تلاتين لازمة، وأن اصلا كيروش بيستشير فينجادا اللي هو المدير الفني لاتحاد الكورة لأن ببساطة الاتنين أصحاب من زمان وهو اللي جايب كيروش كمدرب المهم ف الاخر يا حضرات انها بردوا دايرة مصالح".
وأضاف أحمد البنا "بيلعب افشة دقيقتين في الماتش !! المدرب ده مش عارف امكانيات لاعيبته ايه ولا هيفيدوه ازاي في الملعب والا مش هيلعبهم في مراكز غير مراكزهم او يبقى الملعب محتاجهم ومقعدهم جنبه !! مفيش تفسير طبيعي الا ده لأنه لو عارف وبيعمل كده في التشكيل والتغييرات يبقى مش مدرب ايه الدماغ دي".
كيروش ومنتخب مصر
ورد مصطفى العجمي قائلًا: "الخواجه ده بيتعامل معانا كأننا دوله حديثة العهد بكرة القدم وهو المنقذ والمخلص والعبقري اللي مجابتوش ولاده ولو فضل الحال كده عناد وعنجهيه هيلبسنا اسود بتصفيات كاس العالم".
وقال الرشدي "الخواجه مهنش عليه ندعي له ولو مره واحده بنزول محمد شريف اول الماتش وخلصنا من مروان حمدي لقيناه راكن قفشه وحجازي واكرم علشان الحسد"
وأضافت حنين للماضي "الخواجة لازم يمشي كفاية عك بقى داخلين على كأس العالم مش طالبة عند وحرقة دمنا"
ورد هاني بيجيو قائلًا: "كيروش لا يصلح لتدريب منتخب مصر وبهذا المستوى الهذيل لن نصعد لنهائيات كأس العالم والايام بيننا يا قبطان"
محمد شريف وفشل كيروش
وقال أحمد المصري "محمد شريف يعتبر أسوأ لاعب في المباراه مش مهاجم مصر ولا حاجه هو كمان"
وردت ريهام حجازي "المشكلة في اللعيبة والله لو جابو مين يدربهم برضو مش هنعمل حاجة العيب في الخامة مش في الترزي"
وعلق كريمو جمال قائلًا: "محتاجين حسام حسن من بعد ما مشي كوبر العقيم وجابوا حسام البدري وفشل وجابوا الكرش وفشل وهيرجعوا لحسام حسن غصب عنهم.. في حد بيخرب في المنظومة متعمد"
وقال وليد أحمد "انا رأيي نلحق نفسنا وناخذ الفلوس بتاعت البطوله نديها لكيروش الشرط الجزاء ونمشيه وحسام حسن يمسك المنتخب"
أما رجب سعد فعبر عن حزنه قائلًا: "إحنا منتخب مصر لا تستحق الفوز لأن كان بالإمكان أفضل بكثير من كدا وربنا يكسر بخاطر كورش ده زي مكسر بخاطر المصرين ال في الاستاد"
مصطفى فتحي والمقاصه
ورد حسين محمد قائلًا: "مصطفي فتحي اخره مصر المقاصه #مصر_قطر"
أما علي بن أشرف فقال "هو مصطفى فتحي كل م هيعمل كوره غلط هيلف ويزعق للعيبه ده انا قاعد في بيتنا واتخنقت من الأسلوب ده في الملعب #مصر_قطر"
وقال جندي "السولية... كانوا هيصلبوك لو ضيعتها الحمد لله #مصر_قطر #كأس_العرب #كأس_العرب_2021"
ورد عبد العزيز قائلًا: "استمتعنا الافضل مصر والنتيجة قطرية يستاهلون #مصر_قطر"
أما أحمد فقال "لا يا شريف لا #مصر_قطر"
ورد صلاح بولو "منتخب مصر بيعملك ازاي تضيع 3 ساعات من عمرك في اللاشئ"
وعلق كيم ناي قائلًا: "على منتخب مصر مراجعة أوراقو وحسباته قبل كأس افريقيا وكمان تعليم اللاعبين تسديد ضربات الترجيح بصراحة اسوء فريق شهدته الكرة المصرية"
وأضاف سيف سيد "منتخب مصر بتاع حسن شحاته اعتزل الجيل ده بالمحترفين ضعيف جدا جدا #كأس_العرب".
