غراب البين يكتب: السوشيال ميديا جننت البنى آدمين

بينما كنت جالسا مختبئا داخل ريشى الأسود الجميل فوق سطح أحد المنازل المتهالكة مستمتعا بأنغام أغانى المهرجانات اللى شغالة فى المقهى بالاسفل دون أن انعق او أصدر اى صوت يزعج سكان الشارع أو رواد المقهى وإذا بى أسمع زعيقا وضجيجا يملأ الشارع وفجأة تتوقف أغانى المهرجانات ليبدأ مهرجان من نوع آخر

مجموعة من الشباب يقتحمون الشارع وأشكالهم مش ولا بد.. صدورهم عرايا وأيديهم تحمل السنج والشوم ويهتفون فى صوت واحد "إنزل يا ابن الـ....... انزل ورينا مرجلتك" واخذوا يكسرون كل ما تقع عليه أعينهم والدنيا هاجت وماجت والزبائن تركوا المقهى والستات خرجت فى البلكونات وبدأ إلقاء الطوب ورش المياه على الغزاة وتجمهر الناس منتظرين معرفة أسباب هذا الهجوم التتارى على المنطقة

وهنا لم أستطع البقاء أكثر من ذلك فنفشت ريشى ووقفت على أرجلى واخذت أنعق قاق قاق بأعلى صوتى وأخذ المتجمهرون يهشوننى بأيديهم ويقولون لى غور من هنا يا غراب البين انت اللى جايبلنا الفقر والبلاوى

تركت المكان طائرا ولسان حالى يقول: يعنى النعقتين بتوعى هما اللى جابولكم البلاوى يا شوية بنى آدمين؟!.. طب انا كنت فين لما الراجل قطع رأس جاره ومشى يتفسح بيها وسطيكم.. أنا كنت فين لما المحروس قتل ابوه وأمه وزبحهم بالسكين

اسألوا المخدرات اللى شبابكم بيبلبعها.. اسألوا المواقع الإخبارية اللى بتتسابق فى نشر الحوادث وفيديوهات البث المباشر اللى محتواها كله دم وقتل وزبح

اسألوا نفسكم وانتم بتشيروا كل ده على الفيس وتويتر وكأنكم بتشيروا اغانى العندليب الاسمر

اسألوا أنفسكم وانتم واقفين تصوروا المعركة بمنتهى السلبية وتنقلوها بث مباشر دون أن تفكروا فى التدخل لفك أى اشتباك وكل همكم هو اللحاق بالتريند

قال وبيقولولى انا غراب البين وسبب البلاوى.. دا انتم سبب كل البلاوى اللى انتم فيها يا بتوع الحشيش والمخدرات يا شوية بنى آدمين يا سلبيين يا بتوع التريندات.. جاتها ستين ألف نيلة اللى عايزه تخلف بنى آدمين!