عمر كمال: اللي يوقف حمو بيكا قدام لجنة استماع أصوات يبقى بيظلمه
كشف المطرب عمر كمال، عن رأيه في قرار نقابة المهن الموسيقية بمنع مطربي المهرجانات عن الغناء.
حل أزمة الموسيقيين مع مطربي المهرجانات
وأضاف عمر كمال خلال لقائه ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "عندي حل للخناقة الدايرة دلوقتي بين نقابة الموسيقيين ومطربي المهرجانات، تتمثل في عمل شعبة للمهرجانات مثلما تم إنشاء شعبة للراب".
شعبة المهرجانات
وتابع: "زي ما وافقنا على عمل شعبة لفن الراب لازم يتعمل شعبة للمهرجانات، واحتواء مطربي المهرجانات وتقنين أوضاعهم وعمل تصاريح ليهم، والمهرجانات بقت مسيطرة على الساحة لأن مفيش احتواء ليها".
قرار هاني شاكر ضد مطربي المهرجانات
ولفت: "أنا مع الفنان هاني شاكر إن فيه كلام مينفعش يتقال، وفيه ناس مينفعش تغني، ولكن لازم نحتوي الناس بتاعت المهرجانات".
صوت حمو بيكا
وأشار: "اتعلمت الأدب بعد ما اتوقفت 9 شهور بسبب لفظ "خمور وحشيش" في أغنية "بنت الجيران"، وحمو بيكا لازم ياخد كارنيه مؤدي مهرجانات، واللي يوقفه قدام لجنة استماع للأصوات زي حلمي بكر يبقى بيظلمه".
هجوم ساويرس على هاني شاكر
وهاجم المهندس نجيب ساويرس، رجل الأعمال، الفنان هاني شاكر نقيب المهن الموسيقية، بسبب قرار منع مطربي المهرجانات من الغناء.
الذوق الغنائي
وقال "ساويرس" خلال مداخلة هاتفية ببرنامج "الحكاية" الذي يقدمه الإعلامي عمرو أديب بقناة "mbc مصر": "كل واحد وذوقه.. محدش هيعمل ولي علينا، وأنا باحب أسمع الغناء الشعبي ولون المهرجانات".
وعن تصريحاته حول استضافة المطربين الممنوعين من الغناء في مهرجان الجونة، أكد "ساويرس": "أنا مبقولش حاجة مبعملهاش ولو عايز أجيبهم مهرجان الجونة هجيبهم".
وأضاف: "موضوع منع مطربي المهرجانات من الغناء فيه نفسنة وغيرة.. إحنا نسمع اللي إحنا عايزينه، محدش يتدارى في سلطة أنه يكون قائمًا على أذواقنا، نقيب الموسيقيين شغلته يعالج الأعضاء المرضى، ويقف معاهم ويدعمهم ويصرف لهم المعاشات وييسر لهم أمورهم، إنما هو مش من سلطاته القيام بالمصنفات الفنية، هناك رقيب على المصنفات الفنية وهو مش رقيب على المصنفات".
دعم ساويرس لمطربي المهرجانات
وتابع: "مش دور نقيب الموسيقيين يقول لنا نسمع إيه ومنسمعش إيه، الفن غير العلم، هو نفسه مين اداله القرار أنه يمنع مطربي المهرجانات.. أنا أصلًا مبيعجبنيش غناء نقيب الموسيقيين، القانون لو أعطاه الحق يمنع المغنين يبقى غلط، أنا باحب حسن شاكوش وويجز وحمو بيكا وبسمعهم، اللي متضايق من الغناء ده يقفل الراديو والتليفزيون والتليفون، زي اللي مش بيحب الأكشن ميشوفهاش، عامل لهم إرهاب إنهم لو غنوا هيمنعهم وده مينفعش".
قطع الأرزاق
وأكمل: "هو فيه حد يقدر يحمي عياله وميسمَّعهمش أغاني المهرجانات، هو مش ربنا عشان يحدد لنا نسمع إيه ومنسمعش إيه، واللي خايف على عياله يقفل النت.. قطع الأرزاق ربنا مبيسامحش فيه، وبنقول له استهدى بالله وخلي الناس تأكل عيش وتشتغل.. أنا بتدخل علشان أنا باحب اللون ده وعايزهم ياكلوا عيش، وربنا يبارك لهم في فلوسهم".
