بعد وفاتها.. حلا شيحة لشقيقة معز مسعود: يوم كتب كتابي عينك قالت كتير
أعربت الفنانة حلا شيحة عن حزنها لافتقادها علا مسعود، شقيقة زوجها الداعية الإسلامي معز مسعود، التي غابت عن عالمنا يوم الجمعة الماضية.
وكتبت حلا شيحة على موقع الصور والفيديوهات القصيرة انستجرام، وقالت: زي الجمعة دي الجمعة اللي فاتت، كنا معاكي يا علا وأنت بتتزيني للقاء الخالق من وقتها بسرعة، وأهو عدى أسبوع والنهاردة تاني جمعة، إزاي الوقت بقى سريع كدة، الواحد بقا عنده كمية طول أمل في الدنيا دي لا ينتهي، فعلا الوقت بيبان كأنه طويل ولكنه في الحقيقة بسرعة البرق.
وتابعت: حبيبتي يا علا يا ترى إيه اللي كان بينك وبين الله علشان كم الحب اللي أنا شخصيا شفته، اللي أنا لمسته فيكي، إنك كنتي صاحبة روح طايرة وابتسامة تخطف القلوب ويوم كتب كتابي على معز، كنتي سعيدة جدا بتتأملي بهدوء المشهد كله وكنتي فرحانة من قلبك وفرحانة لمعز وعينك كانت بتقول كلام كتير من غير ولا كلمة.
وتابعت حلا: أنتي كنتي جميلة من جوا ومن برا، ويوم رحيلك كنتي كمان جميلة وربنا اختار لقائك في أحلى يوم في الأسبوع، خير يوم طلعت فيه الشمس يوم الجمعة، حبيتك وهفضل ادعيلك دايما ومستنية في يوم أقابلك في الجنة ونعيمها إن شاء الله يا عروس السماء فعلا، ربنا يصبرنا على فراقك يا جميلة ويصبر أحبابك كلهم، والنهاردة هكون معاكي بالدعاء، اطمني ونامي نومة العروس يا أجمل بنوتة.
أزمة حلا شيحة
وفي وقت سابق كانت الفنانة حلا شيحة صدمت جمهورها وخرجت لترد على تصريحات سابقة لوالدها أيضًا بشأن خطف زوجها مسعود لها، وأنه السبب في أفكارها وتحريمها للفن.
ونشرت "حلا" وقتها عبر حسابها على موقع الصور الشهير "إنستجرام"، تقول: "الحقيقة مصدومة من الكلام اللي والدي قاله عن زوجي اللي اتجوزته بكامل إرادتي والحمد لله لقيت معاه كل المعاني الجميلة من احترام ورجولة وشهامة نادرة الأيام دي، وأنا لم يخطفني أحد كما قال والدي، والكلام ده لا يصح أبدًا".
وتابعت: "أنا بحب زوجي وسعيدة بحبه ليا وبنحترم بعض ومعز بيحترم رأيي وبيقدر مشاعري وبالعكس هو دائمًا بيهدّيني، وطبعًا بيساندني ويشجعني لأني زوجته وحبيبته وهو أكبر بكتير من كل الكلام اللي بيتقال عليه وافتراءات مش صحيحة وهو أبعد ما يكون عنها".
تصور خاطئ
وأضافت الفنانة حلا شيحة: "لن أسمح لأحد الكلام عنه ولن أسمح بأي تصور خاطئ عنه بأي شكل من الأشكال، معز طول عمره له رؤيته الواضحة في الدين وحتى في الفن وهو ليس مع أي جماعة أو فئة معينة هو يمثل نفسه وله أفكاره وآراؤه العلمية والدينية المختلفة الجميلة وليس لأحد أن يصنفه أو يضعه في أي قالب فقط لأن هواه لا يوافق ما يمثله معز هو في إيه في بلدنا الأيام دي بنحارب ونصارع في بعض وعايشين في قصص وهمية من نسج خيالنا عن بعض".
وواصلت حلا الهجوم والرد على منتقديها حيث قالت: "هو خلاص أي حد يتكلم بلغة الدين لازم يبقى متطرف أو إخواني هو مبقاش في مسلمين وسطيين طبيعيين هو ليه كل أنواع الهجوم ده على أي حد، أنا زعلانة من والدي جدًا لأنه يعرف معز كويس جدًا وقعدوا مع بعض كتير ووالدي يحبه جدًا وشاف منه كل خير".
وسردت "حلا" تفاصيل زواج معز قائلة: "معز زيي اتجوز ١٤ سنة من عمره وكان مستقر في حياته وعنده ثلاثة أولاد ربنا يخليهم له جمال ما شاء الله وعمره ما كان بتاع ستات زي ما بيتقال كلام لا يليق أبدًا وفي الآخر زيي لم يكمل جوازه وحدث الطلاق، وكلنا معرضين لده طبيعي أنه كان بيحاول زي أي راجل محترم أنه يلاقي استقرار في حياته في الحلال ومتوفقش أكتر من مرة ودي مش حاجة تعيب أي حد، والحمد لله اتقابلنا وتلاقينا لأن ظروفنا قريبة جدًا وعندي أولاد مثله وأولادنا شبه بعض الحمد لله واستقرينا إحنا الاتنين ليه ده يزعل الناس بدل ما ندعي لبعض بالخير بقينا نتصيد لبعض ونخوض في أعراض بعض هو حصل في مجتمعنا ده إحنا جرالنا إيه، في الآخر بوجِّه كلمة لوالدي الحبيب ألا يصح أبدًا كلامك مع كامل احترامي لك وللجميع".
