مناخوليا.. أنا المخطئ الوحيد
حالة الهرتلة التى نعيشها ويعيشها معنا كل المهرتلون من حولنا جعلتنى أشعر دائما بأننى لست على صواب.. نعم طالما الأمر يحتمل لرأيين مختلفين فانا دائما هو المخطئ الوحيد بينما كل المخطئين من حولى باتوا على صواب
مناخوليا فيسبوكية تويترية تيكتوكيه.. أسوارها تحيط بنا جميعا وتدار بمعرفة مجموعة من العقلاء وفّتّح ياابنى فّتّح شوف مين بيكلمك.. دانا عنتر المدردح بصباعى أخرشمك
_ الفيلم يسئ لسمعة مصر
= هيسيئلها ازاى يا غبى.. هى يعنى مصر دى واحده ست والفيلم كشف عورتها؟!
_ طب الفيلم مافيهوش أى إسائه والفن دايما بيعالج القضايا الشائكة وشابوه للى عملو الفيلم
= إيه الكلام دا يا عم الغبى.. فنون إيه دى اللى مش بتظهر غير القازورات وعشوائيات تم القضاء عليها.. الفيلم دا سُبه فى جبين الوطن
_ ماشى ماشى انا غلطان.. بس الأسعار هتضاعف بدءا من أول الشهر
= يا أخى بلاش إشاعات ومترددش كلام الإعلام السازج المغرض اللى عايز يهيج الناس
_ طيب طيب خلاص فهمت.. أصل الإعلامى اللى قال الكلام ده غاوى إشاعات وأفوره وقاصد يغيظ الناس ومافيش حاجه اسمها الأسعار هتضاعف
= انت بتقول إيه يا بنى آدم.. دا الإعلامى دا بالذات مش بيقول غير المعلومات الأكيده.. دى الحكومة بنفسها هى اللى بتديله الاخبار والحكايات اللى بيقولها
_ خلاص خلاص انا غلطان.. بس وزيرة الصحة شكلها ضمن المتهمين وحكاية مرضها دى تمثيليه علشان يغطوا على فعلتها الفظيعه
= يا إبنى بلاش هرتله.. دى وزيرة الصحة بالذات أول واحده ضحت بنفسها وراحت للصين علشان تحمينا من الكورونا.. الست مجهوداتها واضحه للجميع
_ يا شباب بلاش ترددو الإشاعات.. وزيرة الصحة تمر بظروف صحية صعبة وعلشان كدا كلفوا وزير التعليم العالى بأعمال وزارة الصحة لحين شفائها ومافيش حاجه اسمها انها متهمه وسيبكم من الهرى ده
= يا إبنى دا انت اللى بتهرتل ومش فاهم حاجه.. دا هما مطرمخين على الخبر ومش عايزين يقولوها صريحه بأنها ضمن المتهمين
وهكذا كذا فزوره.. والحل يكون حاجه مشهوره.. وأعترف أنكم جميعا على صواب بينما أنا هو المخطئ الوحيد.. وشكرا لوسائل التواصل الإجتماعى التى جعلتكم جميعا خبراء فى كل حاجه.. الكل محللين وسياسيين واقتصاديين ورياضيين وزراعيين إلا انا.. عايش وحدى فى المناخوليا!
