رحمة حسن تكشف حقيقة رفضها تدخل نقابة المهن التمثيلية في أزمتها مع هاني أسامة
نشرت الفنانة رحمة حسن، بيانا تفصيليا بشأن أزمتها مع المنتج هاني أسامة، بخصوص تأخر صرف مبلغ 40 ألف جنيه لصالحها منذ عام 2018.
وردت رحمة حسن في بيانها على تصريح الدكتور أشرف زكي، نقيب المهن التمثيلية، بأنه تواصل معها، وطلب منها التقدم بشكوى لنقابة الممثلين، وأن الفنانة رفضت تدخل النقابة.
بيان رحمة حسن
وقالت رحمة حسن في بيان نشرته عبر حسابها الرسمي على موقع التواصل الاجتماعي لتبادل الصور والفيديوهات الشهير "انستجرام": "أولا: كل الاحترام والتقدير للدكتور أشرف زكي.. علي استجابته وسؤاله.. واحب اوضح ان الفلوس الي ليا عند هاني اسامة المنتج هي باقي اجري عن مسلسل سابع جار.. وكان ليا جزء كبير منها.. ولجأت للدكتور اشرف في 2019 علشان يساعدني.. وحصل.. واداني جزء بسيط من فلوسي.. وللعلم الوقت ده كان بابا تعبان وفي المستشفي وهاني اسامة كان عارف وقلتله اني محتاجة الفلوس ارجوك.. ورفض بعدها يديني اي فلوس من باقي اجري ومكانش بيرد علي رسايل او مكالمات مني.. للأسف بابا اتوفي بعدها بكام يوم..ومن ساعتها وانا تعبانة ومش ناسية هو عمل معايا ايه".
وتابعت رحمة حسن: "كان صعب عليه اني اطلب تاني من دكتور اشرف انه يتدخل لان هاني مش بيستجيب اصلا..وانا كنت تعبت من كتر مابطلب حقي وهاني بيتهرب.. بس بين كل فترة والتانية كنت ببعتله رسالة او اكلمه وبرضوا مافيش حاجة.. كل ده بمنتهي الذوق والاحترام والرسايل موجودة معايا من 2018 كله علي التليفون.. وطبعا الوقت بيعدي وانا معنديش شغل ماعنديش دخل.. تعبت وبعتله تاني من كام يوم وقلتله.. وبرضوا مافيش حاجة".
وأضاف البيان: "كمان العقد بتاعي معايا ومخصوم منه الضرايب الي دائما بدفعها علي اي عمل بشارك فيه من زمان.. العقد بتاعي علي مسلسل ٦٠ حلقة.. هاني صور وذاع 67 حلقة يعني ليا كمان 7 حلقات مش موجودين في عقدي وماختش عليهم كمان اجر وماطلبتش بيهم اصلا بس هو عارف.. الفكرة انه طلع ان في كذا شخص في الشغل مش انا بس، عندهم نفس الموقف مع هاني.. ويمكن بفلوس اكتر بكتير وفي نفس الموضوع والنقابات والقضيه وما الي ذلك".
نقابة الممثلين
وقالت في البيان: "اما بخصوص ان الدكتور اشرف طلب مني اني اروحله النقابة عشان نتكلم في الموضوع.. انا قلتله اني مش عايزة اتعبه اكتر من كدا معايا.. خصوصا اني عارفة اني مش نقابية واني بشتغل بتصاريح ومش عايزة اضيع وقته خصوصا انه ساعدني قبل كدا.. وكمان عشان عارفه ان هاني مش بيستجيب عشان هو منتج فيتبع نقابة تانية.. وكنت عارفه ان الدكتور اشرف كلمه قبل كدا في موضوع الفلوس ده وبرضوا ماحصلش حاجة.. يعني لو كان عايز يدفع كان دفع من زمان.. المسلسل اتذاع وخلص وهاني عمل بعده كذا عمل.. انا قلت للدكتور اشرف اني مش هاقدر اجي لاني تعبانة واني مش هاشيل البوست لحد ماخد فلوسي.. لاني بحاول اجيب حقي الي بقالي 3 سنين مش عارفه اجيبه".
واختتمت: "شكرا لكل حد اهتم.. بس انا حبيت اوضح ايه الي بيحصل.. وشكرا لكل الي ساعد والي بيحاول يساعد.. وللعلم انا لسه ماخدتش فلوسي برضوا.. شكرًا واخيرا.. لم ادلي باي تصريح صحفي ولست مسؤولة عن اي كلام يكتب بالنيابة عني".
