أحمد سالم: ضميري صحي فجأة وعايز اعترف بسر خطير عن الإسكندرانية
داعب الإعلامي أحمد سالم، متابعيه، بمنشور عبر حسابه الرسمي على موقع التواصل الاجتماعي "فيس بوك"، حول حالة الجدل، المتجددة سنويا بسبب المصطافين المتوافدين على محافظة الإسكندرية كل عام من مختلف محافظات مصر.
وكتب أحمد سالم: "أنا ضميري صِحِي فجأة وعايز اعترف لكم بسر خطير عن الإسكندرانية".
وتابع: "أيوه إحنا فعلا عندنا شوفينية مفرطة وتضخم في الذات يصل أحيانا إلي جنون العظمة وبصراحة ولولا الملامة كنا طالبنا بالاستقلال التام أو الموت الزؤام، أو عالاقل بناء سور الإسكندرية العظيم عند بوابات الرسوم زي اللي ترامب كان عايز يعمله علي حدود المكسيك، مع عمل تأشيرة لمنع دخول الإخوة المصريين من ذوي الملابس الداخلية البيضاء اللي بيهجموا علينا في الصيف".
والحقيقة اننا مقتنعين تماما إن مفيش حد بيفهم في الأكل زينا وإننا أصل السمك والكبدة والكباب والكفتة والفول والسدق والفلافل والفطير الحلو والحادق والجعضيض والحلبسة والدوم وأي حاجة بتتاكل او تتشرب في الكرة الأرضية وعايزين نعترفلكم إننا لما بنحب نثبتكم وننصب عليكم ونبيعلكم الهوا في ازازة بيبسي، بناخدكم لفة علي البحر مع غدوة عند القلعة او في المنتزه وبسكوتة جيلاتي من عند عزة او النظامي او صابر،
وساعتها بتمضوا علي وثيقة التنازل عن العرش وانتوا مغمضين.
واختتم منشوره: "احنا اتربينا علي إننا أصل السينما والثقافة والحلاوة والطعامة واللذاذة، وأي حاجة حلوة في مصر تبقي اكيد ابتدت عندنا وأي حاجة وحشة تبقي من باقي أفراد الشعب جت لنا احنا معندناش دكاترة نفسيين وأدوية اكتئاب وكدة، اللي بيتضايق او يتخنق حدانا سواء غني او فقير، بياخد لفتين عالبحر من بحري للمعمورة ويضرب ٤٥ ساندوتش كبدة من عند فرج ابو خالد وبدل قرص السيبرالكس يديها قرص فلافل من ابوربيع ويروح بيته زي الحصان حتي اللغة احنا فيها الأصل والأساس ولو الطماطم اسمها قوطة زي مابتقولوا كان زمان البطاطس اسمها بوطة من الآخر كدة احنا بنعتبر العالم ماهو الا اسكندرانية وآخرين ولو اللي بني مصر كان في الأصل حلواني، فاللي بني اسكندرية كان رسام وليوناردو دافينشي كان بيقول له ياعمي".
رمضان 2021
وفي رمضان الماضي، كانت "فيتو" أجرت استطلاعا للرأي، حول أفضل مذيع في شهر رمضان، وكان تصويت الجمهور لأفضل مذيع من نصيب الإعلامي الساخر أحمد سالم.
