مناخوليا: هنحلها ازاى دى

التناحر.. سوء الأدب.. العصبية.. الكبت.. التفكير السلبى.. الصداع النصفى.. الحسد.. الغِل.. السحر.. الخصام.. الطلاق.. القتل.. الإنتحار.. تلقيح الكلام.. كل هذا أصبح اسلوب حياة ولا أدرى ما الذى تغير فى مجتمعاتنا لنصل لهذا الاسلوب من الحياة

حتى المجاملات اصبحت كدا وكدا.. مش من القلب ولا حتى بتوصل للقلب.. كل دا كان ليه.. انا معرفش.. ولما حاولت اعرف معرفتش.. بس قلت لنفسى جايز يكون السبب هو الفلوس..جايز يكون قلة الإيمان

وعرفت أن التفكير فى هذا الموضوع ممكن يودينى للمناخوليا من اوسع أبوابها.. لذلك قررت أن اكتب بدون تفكير.. وياريت تقرأ انت ايضا بدون تفكير طالما موجود معانا هنا فى المناخوليا

انت يا عم الحاج لو سافرت أوربا مثلا هتلاقيهم مفرفشين ومبسوطين ومرتاحى البال مع انهم برضو عندهم مشاكل.. لكن الفرق بينك وبينهم انهم عندهم دخل شهرى بيكفى كل احتياجاتهم اليومية.. وطبعا ملهمش دعوه بمشاكل غيرهم.. ولا بيحشروا نفسهم فى اللى ملهمش فيه

احنا بنفكر هنجيب الفلوس ازاى مع اننا بنشتغل ومعظمنا موظفون.. لكن دخولنا لا تكفينا دائما.. اللى بيفكر فى الفلوس هناك هو اللى عايز يبقى غنى ومش زى غيره من العوام.. اما اللى بيفكر عندنا فى الفلوس هو اللى عايز يعيش عيشه كريمه مش اكتر ويبات من غير ديون

الرئيس بيحاول يعمل اللى عليه.. لكن احنا علشان نتجنب الغل والحقد وكل الحاجات اللى موجوده فى اول المقال ممكن نعمل إيه؟!