شاب يهنئ أمه بتخرجها في كلية الحقوق.. وردود أفعال واسعة على مواقع التواصل
تداول رواد موقع التواصل الاجتماعي فيس بوك بالإسكندرية، منشورا لشاب يدعى محمد مرزوق صاحب محل حلويات، يهنئ فيه والدته بحصولها على ليسانس الحقوق جامعة الإسكندرية، ومرفق مع المنشور صورا له مع الوالدة وأشقائه الثلاثة، وهو الأمر الذي أثار ردود أفعال واسعة من رواد موقع التواصل الاجتماعي فيس بوك.
وكتب محمد مرزوق منشور على صفحته بفيس بوك، قائلا: النهاردة ماما اتخرجت من كلية حقوق إسكندرية بتقدير عالي، ماما مكملتش تعليمها عشان تتجوز وهي عندها ١٨ سنة وجابت ٤ أولاد وبعد طلاقها من بابا من حوالي ١٠ سنين جالها حالة من الاكتئاب.
وأضاف مرزوق، اقترحنا عليها انا واخواتي أنها تكمل تعليمها وده ممكن يشغلها شويه من اللى كانت فيه وان حياتها ممكن تتغير شويه وفعلا اخدت القرار ده ودخلت الثانوية العامة وذاكرت واجتهدت وجابت مجموع كبير بعد كده اختارت تدخل كلية الحقوق وفعلا دخلت الكلية وبدأت تحضر المحاضرات وتذاكر زي اي حد لحد ما جه اليوم اللي تتخرج فيه وبتقدير كمان.
وأوضح مرزوق، انا واخواتي عمرنا ما كنا نتخيل أنها توصل للمرحلة دي، احنا بجد فخورين بيكي يا امي فعلا علمتينا يعني ايه مفيش حاجه اسمها مستحيل وأن دايما فيه أمل.
مثال للنجاح والطموح
وأختتم: ربنا يخليكي لينا وعقبال ما نشوفك احسن محامية في مصر لأن الحلم والطريق لسه مخلصش مبروك يا امي على فكرة هي كمان جالها عريس من سنة وجوزناها فهي عروسة أيضا.
