أفشة بعد تحقيق العاشرة: جيل أبو تريكة رجع والأهلي نعمة | فيديو

قال محمد مجدي أفشة، نجم النادي الأهلي ومنتخب مصر: "لما قلت جيل أبو تريكة وبركات ووائل جمعة راجع مقولتش إننا هنبقى زيهم ولكن كان قصدي أننا هنحاول نعمل حاجة زيهم لأنهم عملوا تاريخًا كبيرًا فإحنا عايزين نبقى زيهم، ولو نقدر نعديهم هنعديهم علشان الكيان والجماهير".

دعوات الأسرة
وتابع خلال تصريحات لقناة "الأهلي": "أبويا وأمي وأخواتي ربنا يخيلهم ليا وقبل الماتش كلمتهم فيديو وإخواتي الصغيرين وأولاد أخويا بيدعولي وربنا بيكرمني علشانهم، والحمد لله بتعب في التمرين علشان كده ربنا بيديهم".

حصد البطولات من أجل جماهير الأهلي
وأكمل: "اللي بيلعب في النادي الأهلي هو في نعمة لازم يحمد ربنا عليها ويستغلها، وأبارك لكل جماهير النادي الأهلي وهما عايزينا ناخد كل البطولات وإحنا نفس الإحساس ولكن ساعات بيكون فيه تعب وإجهاد وظروف وضغط مباريات ولكن دي مش حجج ولا أعذار، والفترة الجاية ربنا يكرمنا بالدوري".

وتُوج النادي الأهلي ببطولة دوري أبطال أفريقيا للمرة العاشرة في تاريخه بعد الفوز على كايزر تشيفز الجنوب أفريقي 0/3، مساء أمس السبت، في المباراة التي جرت على ملعب محمد الخامس في الدار البيضاء بالمغرب، في نهائي بطولة دوري أبطال أفريقيا.

الأهداف
سجل أهداف الأهلي كل من: "محمد شريف في الدقيقة 53، ومحمد أفشة في الدقيقة 64، وعمرو السولية في الدقيقة 74".

حالة طرد
وتعرض هابي ماشياني، لاعب كايزر تشيفز، للطرد في الدقيقة 45 بعد تدخل عنيف على أكرم توفيق، وبعودة الحكم البوروندي باسيفيك لتقنية الفيديو الفار قام بإلغاء إنذار اللاعب وأشهر له الكارت الأحمر.

اللقب العاشر
النادي الأهلي تُوج ببطولة دوري أبطال أفريقيا في 10 نسخ "رقم قياسي"، وذلك في أعوام "1982، و1987، و2001، و2005، و2006، و2008، و2012، و2013، و2020، و2021".