ميعملهاش إلا المصريين.. أديب يعلق على فيديو غريب لإنزال كراكة من أعلى سيارة نقل

علق الإعلامي عمرو أديب على فيديو متداول يرصد لحظة نزول "كراكة"، من أعلى سيارة نقل، قائلًا: "أنا معرفش الفيديو ده من إمتى لكن ده نظرية جديدة فى الفيزياء.. ميعملهاش إلا المصريين.. بص يا مؤمن ده لا سحر ولا شعوذة".

وأضاف أديب خلال برنامج "الحكاية" المذاع على فضائية "إم بى سى مصر": "ده شيء خطر.. الراجل ده بينزل الجرار من فوق السيارة النقل.. ده بيعمل نظرية كونية.. والجرار ده لو اتقلب كان حصل كارثة".

وتابع: "الشارع كله وقف يتفرج على نظرية جديدة فى الفيزياء والتوازن.. والراجل ده مش أول مرة يعمل كده.. شوف بقى الجاروف هيسند على العربية تاني بعد ما كان ساند على الأرض علشان ميتهبدش فى الأرض.. بص بص.. ده حاجة تدرس وخطر جدًا.. كل ده علشان توفير 30 جنيه.. ده لو كان اتقلب كان راح فيها 6 أشخاص.. شيء لا يصدقه عقل وهذا لم نسمع به من قبل.. ومحدش بره ممكن يصدق ده.. ده عبقرية خطر وكان ممكن العربية النقل تتقلب".

وكان رواد مواقع التواصل الاجتماعي تداولوا مقطع فيديو لسائق معدات ثقيلة يقوم بتنزيل "كراكة"، من على سطح سيارة نصف نقل.