تريزيجيه: حلمي العودة للأهلي وكنت على وشك الانتقال إلى ناد كبير في إنجلترا

قال محمود حسن تريزيجيه، لاعب المنتخب الوطني، المحترف ضمن صفوف أستون فيلا الإنجليزي، إن عودته للنادي الأهلي حلم من أحلامه.

وأضاف:" أتمنى العودة وأنا واقف على رجلي وأحقق بطولات للفريق".

وتابع تريزيجيه، في تصريحات تلفزيونية لبرنامج "البيت الكبير" على قناة الأهلي": " ‏جوزيه قالي وهو ماشي انت هتكون أحسن لاعب في مصر لأنك احسن ناشئ دربته في مسيرتي، وصلت للدوري الإنجليزي لأني أتربيت في الأهلي وده مش كلام شعارات وكنت عارف أني هعدي على محطات كتير عشان أوصل للمكان ده".

وأردف:" كنت على وشك الانتقال إلى أحد الأندية الكبيرة في إنجلترا هذا الصيف لكن الحمد الله على كل حال".

وتابع تريزيجيه:" خرجت من مصر ما بعرفش غير هاي وباي وكنت دايما ماشي بورقة مكتوب فيها عايز أكل أو عايز حاجة ولما أروح لحد أوريهاله عشان أخلص حاجاتي ودلوقتي الحمد لله بقيت اتكلم انجليزي كويس".

تيشيرت صلاح والنني
واستكمل: "كان نفسي في تيشيرتات محمد صلاح ومحمد النني وأنا في قاسم باشا بس قلتلهم مش هاخد التيشيرت إلا لما ألاعبكم في البريميرليج وحصل فعلا صلاح خد 7 والنني 3".

الإصابة بالصليبي 
وأردف تريزيجيه:" عندما أصبت  ‏بالرباط الصليبي رفضت أخرج والحكم شاورلي عشان أنزل المدرب بيقولي رايح فين قلتله هكمل وبعد مانزلت لاقيت نفسي مش قادر أشيل نفسي ووقعت، اللاعيبة سألت صلاح ماله، قالهم ده مش هيقع إلا لو في كارثة".

واختتم: رفضت عرض  انتر ميلان عندما كنت ألعب لقاسم باشا لأنهم طلبوا اللعب موسم مع بارما بسبب اكتمال الأجانب في القائمة فقررت الاستمرار في تركيا لأن هدفي الأساسي الدوري الإنجليزي".