ألف جريدة وألف إذاعة والأخبار فى ساعات خداعة
![شلاليت](images/no.jpg)
شلاليت
ألف جريدة وألف إذاعة
والأخبار فى ساعات خداعة
كُله كلام فى كلام فى كلام
كالبياع بيبيع فى بضاعة
كله اتعلم رص كلام
ومافيش فيه خطوة لقدام
كُله عايزنا نشد حزامنا
والظالم نضرب له سلام
والمضروب مش دارى بحاله
دايخ بين الناس بسؤاله
كل حقوقنا بينهم تاهت
والغلبان محتار بعياله
كله بيخطب فى الإذاعات
ويصرح بحاجات وحاجات
والقيادات حناجرهم عالية
كل شوية فى مؤتمرات
كل الناس مش ناقصه فتاوي
والمساكين مش غاوية بلاوي
بطلوا حبة كلام وغناوي
وبلاش تتلاعبوا مثل الحاوي
الناس خايفة الحق يضيع
والمتدارى يا خلق فظيع
والناس ماشية يا عالم خايفة
والعالم بقى وضْعُه شنيع