بديع يعلق لافتة "كان حلم وراح"
أكد مصدر لوكالة هريدي نيوز أن بيان الجيش امبارح خلى الناس خرجت في الشارع واعدوا يهتفوا مصر مصر مصر كل واحد تلات مرات كده زي الكتاب ما قال.. لا حرف زاد ولا حرف نقص.
وكأن يعني حلم المرشد ومكتب الإرشاد كان ناقص تعازي أكثر من الهم اللي هما فيه.. يعني مش كفايه شباب الجماعة جالهم "استبحس" لا كمان قيادات الجماعة بدءوا يفقدوا دماغهم واحد ورا التاني.
وقال مصدرنا إن واحد منهم حبس نفسه في أوضته وقعد يقول "أنا اللي جبت ده كله لنفسي" والتاني طلع فوق البرج ولحقوه بالعافية بعد ما كان عمال يقول "لا أنا جامد أوي.. آه.. أنا مش جامد ولا حاجة" وكان عايز يقلد فرافيرو.
في نفس الوقت المفروض إن المرشد أجمد واحد وأعصابه صلبة.. علق يافطة على باب مكتبه مكتوب عليها ما حدش يسألني فين امتى وإزاي.. "كان حلم وراح"!
