إحباط من تحت الباط !!
بعد اللي شفناه إمبارح كلنا في التليفزيون وعلى أسفلت الواقع اللي اتحطمت عليه كل أحلام الإخوان، والأعداد الغفيرة اللي كانت مصممة تعترض حتى لو وقفت غنت ورقصت وكل الناس كانت عايزة حاجة واحدة بس.. هو يمشي مش هنمشي.. في حين اختفى تماما الطرف الثالث واختفى نهائيا قائلو العبارة الشهيرة "اعتبره ابوك يا أخي" وذلك لمعرفتهم الجيدة بأن اللي هيقولها هيتعمل معاه "الصح " .
أظن بقى ما فيش أي حل أدام اخواننا الإخوان.. غير انهم يستسلموا ويرفعوا الراية البيضا بدل رايتهم الخضرا اأم سيفين شبه سيوف شكارة الأرز دي ويعلنوا فورا أنهم جالهم أنيميا حادة بسبب أنهم ما أكلوش بقالهم شهر من ساعة ما بدأت حملة تمرد..
وجالهم كمان ضغط بسبب تصريحات اعداد جمع التوقيعات يقوم يجيلهم سكر كمان بعد حرق المقر بتاعهم امبارح.. لا بصراحة كده كتير وحرام..مش ناقصين كمان بسبب اعداد المعتصمين في كل المحافظات يجيلهم إحباط من تحت الباط..
