بلاش كل حارة تقوم فيها غارة | ساخرون
شلاليت
ح أصوم عن النقد حبه بس مش قادر!
أسمع كلامكم وأقول في كل شيء حاضر
طب أعمل إيه ما تقولوا لي الكل عايز؟
أنا خلاص ح انفجر منكم منيش صابر
فيه ناس بتهتف يا عالم إحنا مش ناقصين
وناس تقف ضدهم وسط الميدان رافضين
وكل واحد له رأي يخالف التاني
وناس كتير زيهم واقفين ومش فاهمين
بقت الحكاية خطب وصريخ وأي كلام
ومستحيل يا بشر نقدر نعيش في سلام
وأقول لك إيه وللا إيه الكل مش فاهم
والكل ماشي تجاه الظلم للإعدام
حكم الشعوب مش خطب أو منظرة وهتاف
ولا ناس هدفهم فقط تنشال على الأكتاف
الحكم محتاج لناس نؤمن بكلمتهم
ونضحي في كل شيء طول عمرنا ما نخاف
شبعنا كتر الكلام عايزين بقي تنفيذ
ومحتاجين رأي صائب يبقي حلو لذيذ
بلاش بقي كل يوم نقف ألوف في ميدان
نسمع كلام الخطب في صمت كالتلاميذ
رمضان كريم الصيام محتاج كلام تاني
مش كل حبة ألاقي الدنيا وخداني
وأقول لك إيه وللا إيه سيبني بقي في حالي
أنا نفسي أرتاح أعيش كالخلق في زماني
