مصر كلها بتدعي عليك.. أقوى هجوم من عمرو أديب على محمد رمضان بعد وفاة الطيار أبو اليسر | فيديو

علق الإعلامي عمرو أديب على وفاة الطيار أشرف أبو اليسر، قائلًا: "الوفاة عملت ردود أفعال عنيفة جدًا في المجتمع المصري".

احترام أشرف أبو اليسر

وتابع خلال برنامج "الحكاية" المذاع على قناة إم بي سي مصر: "أنا كنت أعرف الطيار أشرف أبو اليسر وركبت معه مرة، وكان رجلًا محترمًا وكان أستاذًا في الكلية الجوية، ورفع قضية على محمد رمضان بعدما تم فصله من العمل سنة 2020".

بشرة عمرو أديب لـ محمد رمضان
وأكمل ساخرًا: "عايز أقول لمحمد رمضان أنت لازم ضميرك يكون مستريح ومش لازم تكون متضايق خالص.. هتضايق ليه؟.. دا أنت كنت بتاخد بالك من الراجل علطول ومتابعة حالته وبطبطب عليه، ولما أتنقل المستشفى كنت علطول بتسأل عليه، ولما عرفت أنه اتقهر وراح المستشفى كنت بتسأل عليه.. ما هو مش غريبة عليك زي ما سألت على الشاب اللي اتفرقعت فيه القنبلة ساعة الإعلان".

ضمير محمد رمضان
واستطرد: "مش عايز ضميرك يأنبك يا محمد رمضان.. دا أنت دايمًا جدع وصاحب صاحبك.. مش عايزك تنزعج أبدًا لأننا في الأيام المفترجة والجريمة أخدت دعوات من مصر كلها يا ابني ربنا يجعلها من نصيبك".

وتابع: "الناس لما شافت خبر وفاة الطيار أشرف أبو اليسر رفعت إيدها للسماء وقالت يا رب محمد رمضان.. وهتشوف بركة الدعاء في الأيام المفترجة دي.. أنت أكيد بتبص حواليك وبتسأل النعيم اللي أنا فيه من إيه؟ وأنت شايف النجاح العظيم في رمضان عامل إزاي نجاح ضخم يا ابني.. أنت أكيد بتفكر دلوقتي على اللي بيجرالك.. ولما رميت الفلوس قلت لك ربك مش هيسيبك وهيجازيك.. مصر كلها رفعت إيديها للسماء وقالت يا رب محمد رمضان وربنا يجعل دعاهم من نصيبك".

هجوم المصريين 
واستطرد: "الناس بتشتم ليه يا محمد.. بس ربنا مش هيسيبك بالخير اللي عملته مع الطيار، ولما استفزيت الشعب كله وأنت بترمي الدولارات في الميه.. إن شاء الله أبقى قابلني لو عرفت تنسى مشهد دعوات الناس.. وربنا كبير وهي قبضة واحدة.. أنت بتحب السوشيال ميديا النهاردة أنت تريند 1 و2 و3 بس جواهم إيه.. الحمد لله ربنا اداك على قد نيتك وأنت بني آدم عظيم، وربنا بيجازي الناس اللي بتعمل الصح.. خليك فاكر النهاردة البلد الناس فيها مش هبلة ولا بريالة وبتعرف الحاجات العظيمة اللي أنت عملتها".