كهربا يدافع عن نفسه.. مخنتش الزمالك وأنعشت خزينته بالملايين.. مليش في الشرب.. مش رمضان صبحي اللي أغير منه.. وهذه حقيقة خناقتي مع ابن رجل أعمال بديسكو

فجر محمود عبد المنعم كهربا لاعب النادي الأهلي، عددًا من المفاجآت وتحدث عن الكثير من أسراره الشخصية عن تجربة احترافه في البرتغال، وهل كانت حقيقية أو مجرد كذبة للانتقال للنادي الأهلي، وحقيقة خيانته لنادي الزمالك، ومشاجرته مع ابن رجل أعمال شهير خلال السهر بديسكو ملحق بأحد فنادق القاهرة، وخلافاته مع محمد الشناوي الحارس الأول للأحمر، وتناوله للمشروبات الروحية.



وقال محمود عبد المنعم كهربا لاعب النادي الأهلي: "أنا أشطر من شيطاني بكل اللي أنا بعمله في كل تصرفاتي"، متابعا: "في الزمالك كانوا عارفين أني أهلاوي ولكن أديت كل ما عليّ خلال فترة عملي، وكنت صادقًا لما قبلت شعار نادي الزمالك لأني كنت وقتها منتمي للكيان وأحب جماهير الزمالك".

الاحتراف في البرتغال
وأضاف خلال لقائه ببرنامج "العرافة" المذاع على قناة "المحور": "تجربة احترافي في البرتغال كانت حقيقية ومش كدبة أو فيلم من أجل الانتقال للنادي الأهلي، ولست هاربا كما يردد البعض ومخونتش الزمالك، ولكن النادي هو اللى قصر معايا، ولسه جوايا مَعزة لجمهور الزمالك وبحبهم".

خيانة الزمالك
وأردف: "عمرى ما خنت النادي، وكان أسود يوم في عمري لما ضيعت ضربة الجزاء أمام الأهلي في مباراة السوبر".

مشاجرة 
وعن مشاجرته مع ابن رجل أعمال شهير خلال السهر بديسكو ملحق بأحد فنادق القاهرة ، قال "كهربا": "أنا مبسهرش في ديسكوهات ومحصلش مشكلة مع حد، كنت في مطعم هندي واتعشيت وأنا خارج ماشي فوجئت بمشاجرة في الخارج وحاولت فض الاشتباك بين أطرافها".

نادي المبادئ
وتابع: "لم أعتد السهر في ديسكوهات علي الإطلاق وأحترم أنني في نادي المبادئ والقيم"، مؤكدا: "أنا عصبي جدا ومبستحملش كلمة وحشة عليا أو حد يغلط فيا، وكل اللى بيطلع يتكلم عليا وحش هدفه التريند".

خناقة الشناوي
وعن كواليس مشاجرته مع محمد الشناوي الحارس الأول للأحمر، كشف أن أزمته مع الشناوي كانت مجرد مشادة داخل غرفة اللبس ولم تتطور على الإطلاق، لافتا: "الشناوي معجبهوش طريقة كلامي معاه وكان أسلوبي معاه فعلًا وحش ولكن أنا ماخرجش منى شتيمة أو سباب ضده".

شرب الخمر
وأكد "كهربا": "أنا مبسهرش ولا بشرب خمرة وبمشي في النادي جوا الحيط".


الرحيل عن الزمالك
وعن كواليس رحيله من نادي الزمالك، أكد "كهربا": "اتكلمت مع إدارة الزمالك علشان تجديد العقد فعرضوا عليا 12 مليون جنيه فطلبت 20 فرفضوا وكان ردهم: انت بتبص لزمايلك ليه؟".

خزينة الزمالك
وتابع: "إدارة نادي الزمالك تناست انى دخلت للنادي 84 مليون جنيه في عامين خلال إعارتي لاتحاد جدة في وقت مكنش في النادي فلوس".

النادي الأهلي
وقال محمود عبد المنعم كهربا لاعب النادي الأهلي: "انتقلت للنادي الأهلي طمعا في العودة إلى بيتي وليس من أجل الشهرة أو المال لأني كنت نجما ومعى ما يكفيني من الأموال".

الطموح
وتابع "لو كنت طمعان في فلوس كنت رحت بيراميدز لأنهم عرضوا عليا أكتر بكتير من الأهلي".

غرامات كهربا
وأشار: "طلبت في الأول 20 مليون جنيه في السنة من ادارة الأهلي فرفضوا، وقتها وقعت العقود علي بياض وقلت لهم: حطوا اللى انتو عايزينه.. ولحد دلوقتي مخصوم مني مليون و800 ألف جنيه، وانا مش طماع ولكن طموح، واللى في جيبي مش بتاعي".

أفضل لاعب في مصر
ولفت: "عمرى ما تعاملت بتكبر مع أي عامل أو موظف في النادي الأهلي وكلهم بيحبوني جدا، أنا شايف نفسي أحسن لاعب في مصر مش الأهلي بس وده مش غرور ولكنه ثقة في النفس، ولو أخدت الفرصة هاكون في حته تانية، كل شوية عندي مشكلة وده بيعطلني، ولسه مأخدتش فرصتي في النادي الأهلي ولسه عندي كتير أقدمه للنادي وممكن يكون تقصير مني".


وسوسة الشيطان
واستطرد: "الشيطان وسوس ليا كتير أنى كنت حلو في الزمالك ولكن أنا دايما بأقول: إنت كان حلم حياتك انك تلبس تيشيرت النادي الأهلي، والكابتن ربيع ياسين وحسام البدري وفيريرا أكتر تلاتة طلعوا كل اللى عندي".


أزمة موسيماني
وقال إن المدير الفني للأحمر بيتسو موسيماني مقتنع بقدراته الفنية في إحداث الفارق مع الفريق، لافتًا إلى أنه ينتظر فرصة المشاركة بشكل أساس من أجل التعبير عن نفسه وإمكانياته.

وأضاف: "اتحسدت كتير بعد لما روحت النادي الأهلي وخناقتي مع موسيماني شايفها حسد".

وأكمل: "مشكلتي مع موسيماني سوء تفاهم، والنادي الأهلي دايما فيه قيم ومبادئ وماينفعش حد يغلط أو يتجاوز، والقصة مرتبطة برفض مصافحة المدرب بعد الماتش وكان غصب عني لأني كنت طالع متعصب لأني بحب ألعب فترة أطول وأساعد زمايلي".

وتابع: "موسيماني بيحبني جدا ومش بيكرهني وده اللى أنا حاسه، ولكن عدم مشاركتي في المباريات بصفة أساسية قرار فني ورؤية مدرب.. أنا أخطأت في الواقعة واعتذرت ونفذت العقوبة".

المتربصون
وأردف: "حريص كل شهر إني أدبح بسبب ما أتعرض ليه من الحسد والمشاكل اللى بتقابلني، وفيه ناس كتير متربصين بيا وبيحطوني جوة المشاكل ويكبروا الدنيا.. أكتر حاجة بخاف منها زعل والدي ووالدتي".



رمضان صبحي
وعن حقيقة غيرته من لاعب نادي بيراميدز رمضان صبحي، أكد "كهربا": عمري في حياتي مغرتش من حد ولا غِرت من رمضان صبحي وتيشيرت رقم 7 مش بتاعه وعلشان كده حصلت عليه لأنه كان مشي من النادي".



مستقبل الأهلي
وتابع: "أنا مستقبل الأهلي والجمهور ومش هطلع من النادي أصلا لحد آخر يوم، ولو حد سأل اللاعيبة كلهم هيقولوا أنى أكتر واحد قريب منهم، ولو النادي مش عايزني أنا قاعد في الأهلي".