حكومة ماسكة لنا شومة! | ساخرون
![شلاليت](images/no.jpg)
شلاليت
تمام مش تمام حرام مش حرام
مالكش أنت دعوة بهذا الكلام
مادام فيه حكومة وماسكة لنا شومة
تقول اقتصادكم تمام التمام
فانهوا المسيرة وفضوها سيرة
مافيش داعي يا بني تعارض نظام
وأما الديابة اللي نهبوا الغلابة
فمتروك حسابهم ليوم الزحام
وحل المشاكل في عاطل وباطل
ما يحتاجش طبعا لكُتر الكلام
وإحنا ببساطة كده ع البلاطة
أقولها بصراحة وكل التزام
جميعنا في أزمة مافيش لها لزمة
وحل القضية تشدوا الحزام
ونرضي ضميرنا ونضمن مصيرنا
وبالبركة دايما نسير للأمام
بلاش كل شارع وناصية وحارة
تطالب ضروري بحل الوزارة
وهذا في رأيي يا عالم حرام