شعر العامية.. حمادة محمد حسين يكتب: "خرم إبرة"

الضم هواك بطرف خيط
وعدّى بيه من خرم أبرة
جايز تهدّ اى حيط
واقف ما بينك وبين بكرة
اطلق خيالك للفضا  
اركب طموح المنتهى
وغوص وفتش فى المحيط
على قشة تسند غصن زهرة

من خرم ابرة  يا دنيا
العيون تهوى البصيرة
جوا جوف البير بتهدى
كل ملاح للجزيرة
ومن صمود التحدى
 تقدر تغازل الاميرة 
اغزل ولو برجل واحدة 
اغزل ولو كانت حصيرة
دا الكريم لو رقّ حاله
رافضة إيده تكون قصيرة

لو ركنت لأى عذر وارتضيت
هتبقى جوا الدايرة برة
غوص وفتش فى المحيط
على قشة تسند غصن زهرة


من خرم إبرة الحياة
رافضة معنى المستحيل
رافضة تبقى دى النهاية
تايه ومن غير الدليل
دا انت إذا تغربل ترابك
تمد بيه لبر السبيل
دا الكتير على قد خيره
يبان فى عين الساخط قليل
كن جميلا للحياة
تلقى الوجود جواك جميل

دا لو  تعوم  تسبح فى يوم للغويط
تقدر تغير الحياة من قلب ذرة
 غوص وفتش فى المحيط
على قشة تسند ضهر زهرة