لابد من الكشف عن الصنف المضروب قبل ظهور مذيعى الغبرة على الشاشة..| ساخرون

يا داهية دُقى ووسعيلى بُقى.. هو أنا أطلع من موجة وأدخل في موجة أصعب منها ولا إيه.. ده أنا بقالى سنة قاعد في البيت وحاسس إن الحيطان كرهتنى ونفسها تدخل في بُقى وتشقه نصين
 
واضح إن تامر أمين مسطول يا إخوانا فوقوه، آه والنبى يا أخويا زي ما بقولكو كده.. أنا دماغي سخنت خلاص ومش عارف أقول ولا أعمل إيه.. آه يا شلاضيمى يانى يا يابا.. ده أنا خلاص تعبت منه 

آه ياني يا غلبي قال إيه على رأي المثل جه يكحلها عماها هذا المثل ينطبق على المدعو تامر أمين..حب يجامل ويجود حبتين قام إيه خربها على الآخر 

آه يا شلاضيمي ياني يابا فينك يا حكومة من زمان تريحينا من الوجوه دي بقرار حاسم وضوابط حقيقية وليس فقط مجرد إلغاء رخصة "تيمو" علشان  الغضب ومنعه من الظهور علي الشاشة..

يا إخوانا مش كل واحد عامل دماغ يطلع على الشاشة يهبد..لازم ولابد من الكشف علي "تيمو"  واقرانه وقريناته  وغيرهم من مذيعي الغبرة وكمان لازم ولابد نطبق الكشف عن المنشطات قبل الهوا ولا إيه؟!..

هو مش برضه الفتنة أشد من القتل..وإلا هو كل مذيع هايف يطلع يشتم الصعايدة  أو أهل الريف أو يثير فتنة بين جماهير الكرة، هو مش ممكن كلمتين هبل وهطل من دول يؤدوا لفتنة في بر مصركله يستغلها الأعادي واللي قاعدين ورا الحيطان والا حتي خلف الشاشات هما البعدا جبلات ولا جبلات

وليه نسمح بهذه التجاوزات ونخلي أحدهم يقول إن الصعايدة  واهل الريف بيخفلوا بناتهم ويشحنوهم للعمل في القاهرة كخادمات وأظنه يدرك تماما أن الصنف مضروب وآن الآوان لتغييره!

 أقول قولي هذا وأحب أنبهكم أنني فقط حبيت أهذب النفوس المريضة.. سلامو عليكوووووووووووووو.