هنيدي: طول عمري بنضرب في الخناقات.. وهذه أول مرة أقف فيها أمام الكاميرا | فيديو

قال الفنان محمد هنيدي: إن أول مرة هرب فيها من المدرسة عندما كان طالبا في الصف الأول الثانوي وتوجه لسينما "ماجدة" في العباسية.

وأضاف خلال لقائه ببرنامج "سهرانين" الذي يقدمه الفنان أمير كرارة بقناة "أون إي": "كنت طالبا في المدرسة الثانوية الرياضية وحينما هربت وكنت أرتدي ترينج المدرسة ومكتوب عليه اسمها، وكنا قاعدين نتفرج على الفيلم ومبسوطين أوي وفجأة لقينا مدير السينما ومدير المدرسة يقفوا أمامنا واتاخدنا على المدرسة وأسبوعين فصل".



وتابع: "أول مرة وقفت فيها أمام الكاميرا كان برفقة عمرو عبد الجليل خلال سهرة تليفزيونية بطولة الفنان الراحل شكري سرحان وتقاضيت خلالها 100 جنيه واشتريت موز سعره غال وذهبت للبيت وأنا سعيد".

ولفت: "كنت شغال على المسرح في مسرحية عفروتو وفجأة لقيت حد قريبي واقف في الكواليس وبيحرك شفايفه وبيقول إن مراتي عبير ولدت، ووقتها حسن حسني هزر على المسرح والجمهور تقريبا فهم وجريت ورحت والحمد لله ربنا رزقنا بفاطمة".

وعن أول مرة يقوم فيها بطهي الطعام، قال: "أيام ما كنت في معهد التمثيل وكنت ساعتها بفتي لحد لما اتعلمت وبقيت أشهر طباخ مع أصحابي"، ليعلق أمير كرارة: "أول مرة عملت فيها بطاطس ولعت ساعتها في البيت والطاسة ولعت".

وأشار إلى أن أول مرة شخص يطلب منه التصوير معه كان خلال عرض فيلم "قلب الليل" في سينما سفنكس.

وعن أول مشاجرة له في الشارع، علق: "طول الوقت بضرب، أول مرة أتخانق في الشارع كانت عند سور المدرسة، وأنا خارج أنا وأختي لقيتها بتقولي فيه واحد هنا ضربني وعيطت فلقيته عيل مدملك كده ومتكلمش ولا كلمة ولقيت دخل عليا وضربني في عينيا وشالوني وقعدت 3 أسابيع عينيا الاتنين ورمة، وبعد كده خدنا تارنا وكانت خناقة صعبة".