الفلاحين: أزمتنا مع البنك الزراعي ساعة تروح وساعة تيجي.. "ساخرون"

أبين زين..وأقول على المستخبى واللى مش معروف.. وأضرب في ودعي وتمللي بادعي.. والمستخبي بقوله ع المكشوف.


الفلاحين في الغيطان بيصرخوا تايهين.. كُتر المشاكل قرفهم بس يشكو لمين.

يا وزير زراعتنا حاول تعدل الموازين.. بنك الزراعة أو التسليف خانقنا بالدين.

وجمعيتنا الزراعية بقي لها سنين.. بتمص في دمنا بس إحنا مش عارفين.

القطن مركون مالوش شاري بقي وله تخزين.. ده غير مشكلات في الري مش فاهمين!!.

حنعمل إيه واللا إيه وكلكم شايفين.. مصر اللي كانت زراعية وريفها كان متين.

ليه أصبحت في احتياج لمساعدة الزارعين.. ما تقول لنا إيه جري وحقوقنا راحت فين ؟ مش محتاجين تصريحات وفلسفة قوانين.

انزل لهم وشوف مشاكلهم بدون تلوين.. ورجهوا للزراعة مكانها يا حلوين.

حتلاقوا قمح وحبوب وقطن بالملايين.. ونرفض الاقتراض ونسد كل الدين.

وكفاية تأجيل بقي لمشاكل الزارعين.. الفلاحين في الغيطان بيزرعوا وساكتين.

وأنا قلت كل اللي عندي وكلكم شاهدين.. ومرة تانية أقول فلاحنا حُر أمين.