رواد قهوة كفر ابو بلاص

المشهد الأول: القاهرة.. أمام منزل الوزير.. سيارة فخمة وداخلها سائق.. صباح الخير يا سيادة الوزير.. صباح الخير يا حسن.. علي الوزارة دوغري  يا باشا والا فيه ميعاد  قبلها.. فيرد: لا علي الوزارة علي طول بقولك إيه ماتنساش لما تنزل بلدكم يوم الخميس تجيب شوية بيض بلدي أحسن المدام بتحبه.. تحت أمر سعادتك وأمرالهانم..

المشهد الثاني: بعد نزول الوزيرأمام الوزارة.. حسن يتحدث من تليفونه  المحمول داخل السيارة.. أيوه يا تواتي بجولك إيه يا بت جهزي شوية بيض بلدي وفطير مشلتت وجبنة وقشطة لمرات الوزير.. حاضر يا خويا جاي امتا.. يوم الخميس إن شاء الله.. تيجي بالسلامة..

المشهد الثالث: كفر ابو بلاص.. تدخل فتاة شابة بيت عائلة حسن.. اهه يا تواتي جهزت السبت فيه كل الي جولتيلي عليه والله دوخت لحد لجيت بيض بلدي تجوليشي يا ختي الفراخ خلصت من البلد.. آه علي جولك يا بت يا دواهي معادشي حد عايز يربي ويتعب نفسه.. ياختي البلدي يوكل.. ما عادشي خلاص كلهم جاعدين علي الفيس بوك بيعملوا شات ويتحدتوا علي الماسنجر لا عاد حد بيزرع ولا بيقلع ولا بيربي طيور  كلهم بجوا بهوات ومتثجفين.. فيه انستجرام وتويتر وسناب كمان يا تواتي.. طيب يا فالحة.. ماتجوزيني حسن يا تواتي.. جلتله والله جالي أنا مش عايز أروح في داهية واحدة جايبة ليا دواهي.  

الفرق بين المعرفة الحقيقية والموازية ل"كوفيد 19"

المشهد الرابع.. سيارة الوزير أمام منزل حسن بعد وصوله بلده.. تسلمي يا أختي علي تعبك.. تعبك راحة يا خويا ما تغبش بالزيارة المرة الجاية.. يضع حسن السبت في حقيبة السيارة الخلفية ويظهر سليمان   شاب فقير بسيط المظهر والعقل يقترب منهما.. هوا كل اللي في السبت ده علشان الوزير يا حسن.. وأنت مالك غور يا واد أنت من هنا.. طيب هات بيضة.. امشي يا واد  يا عبيط أنت من هنا.. تتدخل تواتي سيبه يا حسن دا واد غلبان علي باب الله وربنا بيبارك لما بنساعده تعالي يا سليمان هجيب ليك بيض من جوه.. لا آني عايز من البيض بتاع الوزير.. ما هوا هوا.. لا آني عايز من بتاع الوزير آني عارف البيض بتاعه فيه صفارين.. يصرخ حسن أنت هتمشي يا مهبوش أنت والا أعدمك ضرب.. يجري حسن خلف سليمان.. يهرب سليمان وهو يردد إلهي ما توعي توصل بالسبت يا حسن وتعمل حادثة والبيض كله يتكسر علي نافوخك..

المشهد الخامس: يختبأ سليمان حتي يعود حسن لبيته ليأخذ باقي أغراضه فينتهز الفرصة ويمد يده داخل حقيبة السيارة التي نسيها حسن مفتوحة ويسرق بيضة..

المشهد السادس: قهوة كفر ابوبلاص.. حوار بين رواد القهوة وهم يشربون الشاي والشيشة.. ذكي أبوراسين.. فهيم أبوالمفهومية.. سعيد المسعود.. فخري المفتخر..

وباء الفيس بوك

عرفتوا اللي حصل سليمان سرق بيضة من سبت الوزير.. سليمان سرق بيضة من بيت الوزير.. سليمان سرق نجفة من بيت الوزير.. سليمان سرق خاتم بنت الوزير.. سليمان خطب بنت الوزير.. سليمان وصل  لفوق واتجوز بنت الوزير وبيقولوا الفرح حضروا كبارات البلد.. ما اسموش سليمان إسمه سولي متخرج من الجامعة الامريكية.. أيوة دا أبوه صاحب مصنع النسيج إللي علي أول البلد إللي جنبنا.. ابوه طلع حرامي واتسجن كام سنة وطلع.. يعني الوزير مناسب رد سجون.. بيقولوا والله أعلم كانت متجوزاه في السر ومخبية عن أبوها.. بيقولوا كمان جابت ولد وموتته.. يبقي الواد المولود اللي لقيوه ملفوف ميت ومرمي عند الترعة إبن بنت الوزير.. ربنا يستر علي ولايانا.. استرها يا رب يلا نصلي المغرب أحسن العشا قربت..

المشهد السابع: من داخل عشة سليمان.. سليمان يقلي البيضة وعليه علامات السعادة ويغني.. ترالالي ترالالي..

هكذا نحن علي مواقع التواصل الاجتماعي إشاعة تافهة ليس لها أصل نمضي أوقاتنا في الحديث عنها ونتفق ونختلف عليها كما لو كانت حقيقة.. وستجد من يحكي عن تفاصيل معازيم وبوفيه الفرح المزعوم وكأنه حضره ثم تتحول القصة إلي اتهامات غير شريفة لابنة الوزير وإلصاق رضيع الترعة بها رغم أن الوزير المذكور ليس لديه بنات.. والقصة كلها مجرد بيضة مسروقة من سبت الوزير..
تقوي اللسان عبادة كالصلاة والوضوء ليس مجرد تطهر بالماء بل تطهر من كل ما يغضب الله..