رئيس التحرير
عصام كامل
Advertisements
Advertisements
Advertisements

ساخرون.. إسماعيل ياسين في نقابة الصحفيين: عقلي سيتوقف عن العمل

إسماعيل ياسين
إسماعيل ياسين
نعم عقلى سيتوقف عن العمل.. رجعولى عقلى والنبى.. إننى أشعر بالانعياى.. آه والنبى ياخويا أنا عيان وحاسس إن شلاضيم بُقى هتسيبنى وتروح مجلس الدولة علشان تشوف لها حل في موضوع انتخابات الصحفيين.


هي نقابة الصحفيين بقت كده ليه.. كل واحد واقف للتانى عالواحدة كدة ليه.. وانتخابات إيه وهباب إيه اللى انتم بتتخانقوا عليها دى.. أنا عن نفسى لو زودتم البدل بتاعى اعتبرونى انتخبتكم كلكم مع بعض.. قال انتخابات قال.. الحقنى يا عم عفركوش يا إبن برتكوش وابعتلى الزيادة بتاعة البدل وخد منى كارنيه النقابة والعب بيه كوتشينة.

آه يا شلاضيمى يانى يا ماما.. الجنازة حارة والميت مش عايز يموت.. ده إحنا أخطر على بعض من فيروس الكورونا.. آه والنبى زمبقولكم كدا.. كل واحد له هدف وغاية وعامل نفسه مناضل وشايل هم الصحفيين.. ياخى جاتك ستين صحفى يتلموا عليك ويطرحوك علقة سخنة تطلع من نخاشيش نفوخك المنتفخ منك لُه لُه لها لها.

عموما أنا هكلمكم من طراطيف مناخيرى ومن شلاضيم بُقى فاسمعوا وعوا: أنا شايف أنه تتم الدعوة للانتخابات في موعدها.. وبالتالى لن يتم النصاب القانونى للحضور من أول مرة وهو نصف عدد أعضاء الجمعية العمومية.. وبهذا سيمر نصف شهر.. ثم تتم الدعوة حسب القانون لحضور ربع أعضاء الجمعية العمومية وبرضه مش هيكتمل لأن الصحفيين أكيد هيخافوا على أنفسهم من الكورونا..

فالموضوع يتأجل شهر كمان وهكذا حتى يدخل الصيف، ويأتى موعد انتخابات الثانوية العامة.. فإذا أصر وزير التعليم على عقد الامتحانات في ظل الكورونا كما فعلها العام الماضى فسنصر نحن على عقد انتخابات التجديد النصفى.. وإذا لم يصر وزير التعليم فما باليد حيلة ونستنى تانى عادى يعنى الدنيا مش هتطير..

بس بشرط أن نحصل على الزيادة بتاعة البدل.. وأنا كإسماعيل ياسين أوعدكم أن كل الأصوات اللى مصدعاكم في موضوع الانتخابات هتسكت خالص، بمجرد أن يسمعوا خبر زيادة البدل ومش هيسألوكم بتعملوا إيه.. لكن سيتبقى لكم صداع زملائكم المشتاقون لمقاعدكم.. فهؤلاء لن يسكتوا إلا بإجراء انتحابات أو أن تتنحوا عن مقاعدكم داخل المجلس.. فعبده مشتاق لا يتراجع أبدا.. وأقول قولى هذا واستغفر الله لى ولكم.. وانا فقط حبيت أهدئ النفوس.. وسلامو عليكوووووووووووووو.
Advertisements
الجريدة الرسمية