لبلبة: لما بشتغل مع عادل إمام بسيب نفسى.. وتركيزي على عينه وفمه| فيديو

قالت الفنانة لبلبة: إن الفنان عادل إمام والمخرج عاطف الطيب من أبرز الشخصيات التي أثرت في مشوارها الفني.

وتابعت خلال لقائها ببرنامج "باب الخلق" الذي يقدمه الإعلامي محمود سعد بقناة "النهار":"اشتغلت مع الزعيم عادل إمام في كل مراحل عمره  وهو شخصية لازم تحبه وياخد قلبك ولما بشتغل معاه بسيب نفسي لأنه واخد باله من كل حاجة وفهمته وعيني دايما بتكون علي عينه وفمه خلال التصوير لأنه دايمًا بيفاجئ اللى قدامه".

وأضافت:"خلال التصوير مع عادل إمام أكون يقظة للغاية وممكن يعمل رد فعل بوجهه اتعودت انى مضحكش علشان الشغل ميبوظش، والناس كلها حبتنا مع بعض، وأنا كمان بحب الزعيم ومعاه حسيت بنجاحي واستفدت كتير من جماهيريته الكبيرة لأن الناس كلها بتحبه وبحس بيه وأعرفه من ضربة جزمته قبل دخوله استوديو النحاس، ويتناول قهوته قبل الدخول للبلاتوه، وأعرف إذا كان مبسوط أو مزاجه مش كويس".
وأوضحت:"فيلم خلي بالك من جيرانك مكنش دوري كان دور الفنانة ميرفت أمين، وعملت الدور بعد اعتذارها ووقتها كلمني المخرج محمد عبد العزيز وفاروق صبري ووقتها مكنش عندي شغل وقاعدة في البيت مستنية ودايما جاهزة، ووافقت وكان العمل أول بطولة مطلقة لي، والحمد لله طول الوقت جاهزة، والفيلم من أحلي أدواري، وكل خطوة ليا بتكلم فيها مع ربنا".