بقائمة طويلة .. «أحمد أمين» يسرد أبرز ما تعلمه من عام ٢٠٢٠

يحرص الفنان أحمد أمين دائماً على التواصل الدائم مع جمهوره ومتابعيه عبر حساباته الرقمية المختلفة من "فيس بوك وانستجرام وتويتر".

كما تواصل مع متابعيه مؤخراً ببرنامج كامل "أون لاين" عبر موقع الفيديوهات الشهير يوتيوب الذي حمل اسم "فاميليا" لتقديم النصائح للأسر المصرية والعربية، ومعرفة طرق التواصل ولغات الحب بينهم.

وقبل نهاية العام حرص "أحمد أمين" علي سرد أبرز ما تعلمه من عام ٢٠٢٠، وقال أمين عبر حسابه الشخصي علي موقع التواصل الاجتماعي "فيس بوك" :

"فيه دروس بتكون بديهية جدا ومليون شخص نصحك بيها، بس لما بتتحط في موقف مؤثر في حياتك بتتعلم الدرس ده بطريقة أوضح وأقوى

وتابع: أنا قررت في ٢٠٢٠ إن كل ما اتعلم حاجة من موقف اكتبها.. فيه حاجات ما فهمتهاش لغاية دلوقتي وفيه حاجات كتبتها بعد فترة.. وبصراحة مش كل الدروس عملت بيها عشان الواحد ما يدعيش الحكمة والنبوغ بس أدينا بنحاول".

وتابع :"إليكم المحصلة.. المهم حاولت ألخصها فمن الآخر كده أنا اتعلمت في ٢٠٢٠ الآتي:

- إن الأحلام اللي بترسمها لو انت مصدق فيها يبقى هاتتحقق.. حتى لو كانت وقت ما بترسمها تبدو هبل أو خيال.. 

- إن الواحد مش هايستفيد أي حاجة لما يبقى مهموم بالشغل لدرجة الحزن أو الاكتئاب بدعوى إني شخص مسئول وبحب شغلي..  بالعكس.. لو بتحب شغلك خليك بشوش واستقبل كل تفصيلة في المشروع بإيجابية وعامل كل الأطراف على اننا في مركب واحدة.. وده نتيجته طلعت مبهرة. 

- إن الواحد مش مسئول عن نتايج الشغل.. يعني النجاح والفشل فعلا مش بإيدينا.. اللي بإيدينا الاجتهاد والمحاولة.. وده برضه مريح نفسيا إن بعد كل تجربة تراجع نفسك.. عملت اللي عليك.. لو أيوة يبقى كمل في اللي بعده وطنش النتايج.

- إن الكرم.. وحب الخير للآخرين .. بيعمل لك مكانة خاصة عند الناس وبيصنع لك غلاف حماية من المشاكل ما تعرفش جاي منين.. حاجة إلهية كده. 

- أي فريق لو فيه شخص واحد بيصدر طاقة سلبية يبقى لازم يمشي من الفريق حتى لو كان هو أشطر واحد وهداف الفريق وعبقري زمانه.. الشغل مع ناس ايجابيين وبشوشين هايطلع نتايج من الفريق كله أعظم بكتير من جو الشكوى والبكا أو الإحباط والسلبية.

- إن الواحد لو اختار فريق كويس يشتغل معاه ببساطة هايركز في شغله أكتر فهايظهر في أحسن حالاته بمجهود طبيعي منغير حرق عالمكنة.

- أن الترفع عن المطالبة بصغائر المكاسب يفتح لك أبوابا من الخير لم تكن تحلم أن تطلبها.

- أن التواصل والتوثيق الكتابي في أدق التفاصيل يقلل من كم ونوعية المشاكل التي تواجه أي مشروع.

- أن مراجعة النيات والمقاصد والأهداف قبل أي قرار أو خطوة يهون عليك مرارة الندم.. وبالبلدي بينور لك طريقك.

- أن الانصياع عاطفيا وراء شكاوى الناس يصيبك بالغم والبطالة.. الناس تعشق الشكوى.. وعليك أن تظهر لهم دوما أنك منشغلا بحالك.. اهرب بلباقة.. ولا تترك نفسك فريسة لأمراضهم.

- إن التطور مش انك تموت نفسك ولا تتفرم في العمل الشاق.. التطور ببساطة هو الاستمرار رغم الفشل.. إنك تقدر ترجع. 

- أن كتابة المذكرات يوميا أحد وسائل الاتزان النفسي.. واختراع عبقري هاتكلم عنه كتير بعدين لأنه كان من أسباب تغير حياتي فعلا.

وأختتم "أمين" :"وفي النهاية يارب تكون السنة اللي جايه أحلى من اللي فاتت.. ولو حد عنده درس خده السنة دي ياريت يقوله ونستفيد.. وكل سنة وانتم طيبين".

الجدير بالذكر أن آخر أعمال الفنان احمد امين مسلسل ما وراء الطبيعة  وهو مأخوذ عن مجموعة روايات الكاتب الراحل أحمد خالد توفيق، والتي تحمل نفس الاسم وهو أول مسلسل مصري تنتجه المنصة العالمية نتفليكس، وعرض المسلسل "مترجماً إلى أكثر من 32 لغة في 190 دولة حول العالم.

كما تم توفير الدبلجة إلى أكثر من 9 لغات من بينها اللغة الإنجليزية، الإسبانية، الفرنسية، التركية والألمانية وغيرها، وهو أول مسلسل أصلي مصري متوفر بالوصف الصوتي باللغة العربية لضعاف البصر والمكفوفين، والوصف النصي باللغة العربية لضعاف السمع.