مؤلف أغنية "فاكرني ياحب": "كانت عايزة مطرب فتوة"

كشف الشاعر الشاب صابر كمال مؤلف اغنية " فاكرني ياحب" عن كواليس الاغنية، وتفاصيل ما حدث بينه وبين الفنان عمرو دياب عندما قرأ الاغنية لأول مرة. 

وقال صابر عبر حسابه الشخصي بموقع التواصل الاجتماعي فيس بوك: "دار في ذهني سؤال بعد ما خلصت الغنوة دي، مين عنده الجراءة يقول الكلام ده؟! فقلت وارد ألاقي مطرب شجاع يتحمس للتجربة حتى لو هيعدل بعض الكلمات فيها لأنّي عارف أن مش أي حد يقدر ياخد الريسك ويخاطر ويقول كده، ثم عرفت إن عندنا مطرب فتوة اسمه عمرو دياب أخدها من غير ما يغيّر فيها حاجة، ولقيته بيكلمني تاني يوم سعيد بالغنوة وبيقول مقاطع منها معايا وبيقوللي أنت كاتب موضوع من ريحة صلاح چاهين وفؤاد حداد".

وأضاف صابر: "شكراً نجمنا الكبير عمرو دياب، طول عمرك مغامر ومجدد وشجاع وسبّاق، وبشكر أستاذنا وموسيقارنا الكبير وليد سعد اللي حصللي الشرف بالتعاون الأول معاه، وحس الكلام وعبّر عنه بشكل أجمل مما كنت متخيّل، وشكراً للموزع الكبير أحمد عادل ولمهندس الصوت أستاذ أمير محروس ولكل صناع العمل".


وتقول كلمات الاغنية : "اهو ده اللي كنت خايف منه
وعمر الخوف مايرد قدر
عفريت الحب عليا حضر
وده قلبته سم وياما غدر
تاجر غشيم وتجارته قمار
يابتكسب دبل ياتروح هدر

فاكرني ياحب!
انا زبونك السقع المضمون
كان قلبي هنا عندك مرهون
وادتني من الصنف المجنون
ابو العقد واللذي منه

فاكرني ياحب!
ايوه اللي غفلته عليك نور
ورجعتلك بعدها مقهور
وخدت غيره وبعد شهور
طلع اللي بعده اسخم منه

اكرمني ياحب المرة دي
متشدش من رف الماضي
متحطليش فوق جرحي حجر!

بتخم ياحب!
اولها كله بيبقى تمام
بس العيوب بتبان قدام
فجأة كدا بتحصل افلام
دي عيوب صناعة مش استخدام!

بتخم ياحب!
على العموم غطلة وتتداوى
ده جر خير مش جر عداوة
انا عايز احب اغطس وقب
واطلع بقى بحاجة نقاوة

اكرمني ياحب وحياة ابوك
واجيب صحابي ينفعوك
وفوق وخلي عندك نظر

عفريت الحب عليا حضر
وده قلبته سم وياما غدر
تاجر غشيم وتجارته قمار
يابتكسب دبل ياتروح هدر