يسري نصر الله يدعم "فتاة سقارة" بمهرجان القاهرة السينمائي

حرص المخرج يسري نصر الله، على دعم عارضة أزياء سقارة التي تدعى سلمى الشيمي في كلمته أثناء الاحتفال بمئوية المخرج الإيطالي فيدريكو فيلليني، ضمن حفل افتتاح الدورة 42 من مهرجان القاهرة السينمائي الدولي.


وقال في منشور عبر حسابه الشخصي بموقع التواصل الاجتماعي “فيس بوك”: “امبارح في الكلمة اللي قلتها عن فيلليني في مهرجان القاهرة السينمائي حاولت أركز شوية زيادة على شغفه بالستات الممتلئات وتصويره أنيتا أكبرج (الممتلئة) في نافورة تريفي”.

وتابع: “كانت إشارة واضحة للبعض ويمكن غامضة للبعض الآخر للست الممتلئة الغلبانة المقبوض عليها بتهمة الإساءة للآثار وللزي الفرعوني والمش عارف إيه.. الست المصرية ممتلئة عامة والراجل المصري أسمر وتقاطيعه مش مسمسمة عامة”.

وأضاف: “الآثار على حد علمي ملكنا كلنا مش ملك خاص لبتوع الهيئة الفلانية، والوزارة العلانية اللي شغلتهم بالتأكيد مش تحديد مين يقدر يتصور جنبهم ويبقى لابس إيه.. والمؤكد إن مفيش أي لايحة ولا قانون بيحدد وزن اللي حابب يتصور عند الآثار”.

واختتم يسري: “أفهم إنهم يتنرفزوا لو اللي بيتصور قالع.. بس لابس؟ وكمان لابس نفس اللبس إللي بنشوفه في المسلسلات والأفلام اللي فيها تصوراتنا عن الفراعنة؟.. ألف رحمة عليك يا فيلليني، بس الحمد لله إنك عشت وعملت أفلامك في فترة العالم ما كانش لسه خلقه ضيق كده”.

وانطلقت مساء أمس فعاليات مهرجان القاهرة السينمائي الدولي في دورته الـ 42، والتي تقام في الفترة ما بين 2 إلى 10 ديسمبر، وكرم المهرجان الكاتب الكبير وحيد حامد والنجمة منى زكي، وشهد حفل الافتتاح عرض فيلم "الأب - The Father" إخراج فلوريان زيلر وذلك في عرضه الأول بالعالم العربي وافريقيا، وبحضور عدد من صناعه.