"موهبة فوق العادة" .. علي الحجار يحيي الذكرى الـ 71 لميلاد أحمد زكي

أحيا الفنان علي الحجار، الذكرى الـ 71 علي ميلاد الفنان الراحل أحمد زكي، الملقب بـ إمبراطور السينما المصرية، الذي يوافق اليوم 18 نوفمبر عام 1949 ميلاده، في مدينة الزقازيق بمحافظة الشرقية.

وقال "الحجار" : "الراجل ده كان صاحب موهبة فوق العادة.. أحمد زكي، مش ممثل عادي أبدًا، حتى الخواجة جوجل النهاردة بيحتفل بذكرى ميلاده، 18 نوفمبر، لأنه بالنسباله ده النجم اللي عمل "أيام السادات" و "ناصر 56" و" طه حسين". 

وأضاف "الحجار" عبر حسابه الشخصي علي موقع التواصل الإجتماعي "فيس بوك" :"وبمناسبة طه حسين، وإحنا بنعمل أغاني مسلسل "الأيام " كان أحمد زكي يستني لما سيد حجاب وعمار الشريعي والعبد لله نسجل الأغنية المصاحبة للمشهد اللي هيمثله علشان المخرج الكبير يحيي العلمي يفضل مشغل الأغنية أثناء التصوير لإن ده كان بيخليه يعيش حالة المشهد بمنتهي العبقرية، مش بس لإنه ممثل شاطر، كمان أحمد زكي كان مغنواتي شاطر!.

وتابع: "لو ركزت مع أحمد زكي وهوه بيغني تتر مقدمة مسلسل "هو وهي" هتلاقيه بيمثل بصوته معاني كلمات صلاح جاهين مع نغمات لحن كمال الطويل بإبداع وشطارة مايعرفش يعملها أي مطرب محترف.. ولما تسمعه بيغني صعيدي في فيلم البيه البواب تلاقيه بيشخص بأسلوب مناسب للشخصية اللي بيمثلها في الفيلم وبأداء مختلف تمامًا ولايق طبعًا مع الدور"..

https://www.facebook.com/AliElhaggar.Official/posts/1817032371777808


بالمناسبة، مسلسل الأيام، إنتاج سنة 79 كان 13 حلقة بس، مش مسلسل طويل زي مسلسلات الأيام دي، ومع ذلك هو مؤثر وعايش في الذاكرة لحد دلوقتي، كمان الأغاني اللي في المسلسل حوالي 60 أغنية، كلهم جوه الدراما، كلهم كان بيقدرهم كويس أوي ويفهم توظيفهم.. لأنه فنان حقيقي".