إسماعيل ياسين في انتخابات البرلمان: إننى أريد أن أتوظف وظيفة ميرى

إننى أشعر بالتوهان.. وشلاضيمى تكاد أن تهجر بُقى.. فما كل هذه المؤتمرات الانتخابية؟!.. وما كل هذه التصريحات العنترية؟!.. دا كل مرشح ييجى عندنا يقول لنا إنه هيوظف شباب الدايرة نفر نفر وأنثى أنثى واحنا مش عارفين نصدق مين فيهم مع إن وزير القوى العاملة بذات نفسه ما عندوش وظايف حكومية ومقضيها توظيف في شركات الأمن ومحال الدليفرى.

دا أنا شعر دراعى شاب ولسه منتظر الوظيفة الميرى ورغم كدا كل مرشح ييجى يوعدنا بالوظيفة الميرى.. وعندما يصبح نائبا يقول لنا أجيبلكم منين.. هي الناس دى مش بتتكسف يعنى ولا إيه؟!

آه والنبى ياخويا شعرى شاب ولسه بصدقهم علشان نفسى يبقالى وظيفة ميرى ومرتب مضمون.. ومعاش مضمون.. وتأمين صحى زى البنى آدمين الموظفين اللى ماحدش يقدر يرفدهم بجرة قلم.. إننى أشعر بالإنعياى.. آه والنبى أنا عيان ونفسى أتعين بالمؤهل بتاعى كما كنت أحلم وأتمنى.

نفسى أكون موظفا يحولوه للتحقيق لو أخطأ وليس عاملا يقولون له روح بيتكم لمجرد أن شلاضيمه مش عاجبه صاحب الشغل.. نفسى أروح أمضى حضور وأروح وزميلى يمضيلى انصراف في نهاية اليوم.. آه والنبى دا أنا غلبان قوى ومتشحطط وكل شوية تلاقينى في شغلانة شكل وعلشان كدا بصدق كلام المرشحين.

يا داهية دقى ووسعيلى بُقى.. الحقنى يا سيادة المُرشح والنبى وشوفلى وظيفة.. بس متكونش زى الوظايف اللى عند وزير القوى العاملة من نوعية فرد أمن ودليفرى في مطعم وبياع في محل ملابس.

آه يا أدمغى يانى يابا.. دا أنا بقالى سنين بصدق تصريحات المرشحين.. أتارينى ما كنتش أعرف إن تصريحات المرشحين تحتاج إلى مواطن له مواصفات خاصة.. إنها تحتاج إلى مواطن طويل وأهبل ولابس طرطور علشان يوافق يتوظف دليفرى بعد كل السنين دى في التعليم وهو فاكر نفسه هيشتغل زى أبوه وعمه وجوز أخته الكبيرة.. لا واللى يغيظك ويغيظنى ويغيظ أمة لا إله إلا الله إن سيادة المرشح بيقول على الشباب إنهم مش عايزين يشتغلوا وبيرفضوا الوظايف.. عموما أنا مش هطول على معاليك.. وسنلتقى قريبا أمام الصناديق.. يلا بقا.. السلامو عليكوووووووووووو.