‎إسماعيل ياسين في السوشيال ميديا: "يا داهية دُقي ووسعي لي بُقي"

آه والنبى ياخويا كلنا بنهرى في المهرى.. وكأننا لا ورانا شغل ولا مشغلة، نخلص من موضوع ندخل في موضوع.. وكلها مواضيع في منتهى “التفاهتو”.. وكأننا بنهرب من واقعنا “المستنيل” بستين نيلة إلى واقع مهبب بالهباب.. كلنا بقينا في البلالة لا استثنى أحدا..

حتى الإعلام بقى فاتح علينا وبياخد أخباره من صفحاتنا على فيس بوك تحت عنوان “فيما سنهرى اليوم قال إيه ياخويا المدرب الفذ "باتشيكو" الجديد قال إيه عامل وشم على ذراعه ووشم تاني داخلي.. طب وأنت مالك ياجدع.. بقى كل الدوشة والهليلهة دى علشان وشم مدرب ما يوشم سواء في زراعة أو حته تانية أنت مالك؟!.. أمال لو عرفتم عامل الوشم فين هتعملوا إيه..

ده الموضوع وصل لدار الإفتاء المصرية.. هو الوشم حلال واللا حرام يا شيخنا الجليل؟!.. الشيخ أفتى بأن الوشم المؤقت حلال أما الوشم المنحوت بالدم ولا يمكن إزالته فهو حرام.. ياخى حرمت عليك عيشتك منك لُه لُه لها لها.. قاعدين عالفيس بوك وتويتر والإنستجرام بيدوروا على الهايفة علشان يتصدرو لها إننى سأتسخسخ وأتلخلخ من هذا الذي نحن فيه.. أختنا "حلا شيحة" تنشر صورتها بالهوت شورت بعد أن خلعت الحجاب.. طب هي لبست الحجاب ليه طالما عارفة أنها ممكن تخلعه.. إننى أشعر بالتوهان...