إسماعيل ياسين في العيادة: أمك اسمها إيه؟.. اسمها حنفى

إننى أشعر بهزة أرضية داخل نخاشيش أدمُغى.. آه يا أدمغى يانى ياماما.. ده أنا ما كنتش أعرف إن فيه ناس لسه بتتكسف من ذكر اسم أمها أو مراتاتها حتى في المستشفيات وأقسام البوليس.. وتلاقى الواحد منهم بيركبه 100 عفريت لما حد يسأله عن اسم الست والدة حضرته.. فجأة تلاقى دماغه سخنت والعفاريت بتلعب النطة على وجه معاليه.. ده مش واحد ولا اتنين.. ده فيه ناس كتير في نفس الغباوة دى.

ده ياخويا الست "الممرضة" اللى بتاخد أسماء العيانين في العيادة صوتها اتنبح مع الراجل علشان يديها اسم أمه، وهو واقف مستلوح زى التور ومش عايز يرد.. وراسه وألف جزمة أنها تكتب "أم حنفى" قدام خانة الاسم، وبيقول لها أنا لا أكشف عن اسم أمى ولا اسم مراتى.

طب يا أستاذ حنفى أنت مكسوف من اسم مراتك أو أمك ليه.. طب يا هباب البرك أنت ما تعرفش أن مراتك موظفة وزمايلها بينادوا لها باسمها عادى.. هو أنت فاكر إن العميل اللى بيروح لها الشغل بيقولوله روح لمدام حنفى أو أم حنفى؟!.. لا يا روح الست والدتك دول بيقولوله روح للأستاذة مديحة وأنت بتبقى برة القصة خالص.. قال مدام حنفى قال.. الله يخسفك في سابع أرض يا دى الجدع ياللى بتتكسف من اسم أمك ومراتك.. آآآأأخ يا ما نفسى أدب صباعى جوه عينيك.. ياما نفسى أجيب فنجان شاى سخن بيغلى وادلقه فوق نافوخك.. يا راجل يا أجوف يا مجفف.. منفوخ قوى يا أخى زى الديك الرومى كده ليه ومش عايز تنطق الاسم.. هي الممرضة هتسرق اسم أمك يا هباب البرك أنت
كل ده كوم واللى بينده على مراته في الشارع ويقولها يا إبراهيم.. قال يعنى الناس في الشارع هتسرقها منه.. يا أخى جاتك ستين إبراهيم يقرقشوا دماغك الجزمه دى
عموما أنا شلاضيم بُقى وجعتنى ولن أتكلم في هذا الموضوع أكثر من ذلك.. يلا بقى.. سلامو عليكوووووووووووووو