وزيرة الهجرة تعلق على صورتها أثناء تقبيل يد البابا تواضروس
علقت السفيرة نبيلة مكرم وزيرة الهجرة، على منتقديها بسبب صورتها مع قداسة البابا تواضروس.
وكتبت السفيرة نبيلة مكرم على صفحتها الشخصية على موقع التواصل الاجتماعي "فيس بوك": "صدقوني مش فاضيين.. في الوقت اللي الدولة بتواجه تحديات على كل جبهة والشعب مؤمن بالله الواحد وبقيادته المخلصة، ألاقي بعض النفوس اللي اتضايقت من صورتي مع قداسة البابا تواضروس الثاني".
وأضافت: "أحب أفكرهم بصورتي في عام ٢٠١٧ مع بابا الفاتيكان، اللي برضه البعض وقتها انزعج من طريقة سلامي له (Reverence) وعايزة أوضح بعض النقاط:
١. أنا وزيرة مصرية في حكومة مصرية.
٢. أتشرف بطريقة سلامي لرموز الكنيسة.
٣. أتشرف أني وزيرة بتشتغل في عهد تحترم فيه القيادة المصرية كل المواطنين المصريين رغم التركة الثقيلة اللي ورثتها.
٤. أتشرف أني لما باحضر مقابلة مع السيد الرئيس بيعرفني باني الوزيرة المصرية مش بيعرفني بطريقة طائفية.
٥. أتشرف بأني لما أكلم فضيلة الإمام الأكبر على التليفون بقوله يا أبويا وهو بيقولي يابنتي العزيزة.
وتابعت: "خلاصته.. لو حضراتكم فاضيين.. إحنا مش فاضيين ورانا شغل كتير، ورانا نحمى بلدنا ورموزنا مش بس من تحديات خارجية إنما كمان نحميهم من الفكر والثقافة المتواضعة جدا لدى البعض".
