شكلي كان هيبقى وحش.. عمر كمال: تامر حسني جبر بخاطري في حفلة محدش عبرني فيها
عبر مطرب المهرجانات عمر كمال، عبر صفحته الشخصية على موقع التواصل الاجتماعي "فيس بوك" عن حبه للنجم تامر حسني، قائلًا: "أنا بحب الإنسان ده جدًا".
وحكي عمر كمال موقفًا جمعه بتامر حسني قبل 4 سنوات قائلًا: "من حوالي ٤ سنين كان عندى حفلة في العين السخنة في قرية سياحية كان في نفس اليوم الفنان تامر حسنى عامل حفلة فيها.. والقرية بلغتنى أن فقرتى قبل تامر وهطلع أعمل الفقرة على نفس المسرح".
وتابع: "قولتلهم استحالة ده يحصل لأن المنظم مش هيرضي عشان أنا مش نجم ومش معروف ومحدش هيرضي يدينى الفرصة ديه.. قالولى إحنا أصحاب الحفلة والقرار.. قولتلهم يعنى أعمل دعاية وأنا مطمن قالولى أعمل وأنا من جوايا متأكد وعارف أن محدش هيطلعنى ع المسرح ده".
وتابع: "عملت دعاية وناس كتير من بلدى السويس قطعت تكت عشانى وطلعت كام ميكروباص صحابى عشان يشجعونى وعملت كل اللى اقدر عليه .. روحت يوم الحفلة لقيت الحفلة الساعة ٤ العصر على حمام السباحة ومفيش ولا مخلوق أصلا والدنيا حر جدا وحفلة تامر الساعة ١١ بالليل في مكان تانى خالص من القرية .. حتى مغنتش من كتر ما كان مفيش ولا فرد الناس كلها نايمة لاما محدش جه عشان لسه بدرى ع حفلة تامر".
وأردف: "بقى شكلى وحش جدا قدام الناس هطلع كداب وعملت دعاية بالكدب وأنا مليش ذنب.. كلمت طوب الأرض عشان أوصل لتامر وقتها معرفتش محدش خدمنى ومحدش رضى يساعدنى.. كنت أنا وصحبى اسمه محمد سمير كان مؤمن بيا جدا .. روحت مكان حفلة تامر قعدت تحت المسرح من الساعة ٤ لحد الساعة ١١ قسما بالله حوالى ٦ أو ٧ ساعات عشان أضمن ابقى جمب المسرح لأنى لو روحت بالليل محدش هيرضي يدخلنى وانا قسما بالله ما معايا حتى حق دخول الحفلة وكنت قابض من القرية 600جنيه".
واستكمل عمر كمال حديثه قائلًا: "قعدت تحت المسرح بحيث أقدر أكلم أى حد واطلعله اغنى معاه حتى عشان منظرى قدام الناس يبقى حلو.. ٧ ساعات لحد ما النهار راح والليل جه والحفلة اشتغلت وطلعت طبعًا.. كان جمب المسرح جاردات ومنظمين وكله ملخوم في الحفلة وتامر.. كلمت منظم الحفلة مرضيش يطلعنى وقالى استنى للاخر .. كلمت أصحاب الحفلة محدش طلعنى .. اتصلت بكل فنان ممكن يكون يعرف تامر محدش ساعدنى.. شكلى كان هيبقى وحش جدا قدام الناس أنى مغنتش وابن بلدهم محدش حتى شافه عدى من قدام المسرح".
واختتم: "كلمت شخص محترم جدا اسمه حازم شغال مع تامر حسنى وحكيتله .. الراجل راح قال تامر.. راح قاله هاتهولى بسرعة.. وجبر بخاطرى وقدمنى للناس وغنيت جمبه واتصورت.. وروحت رفعت الصور انى كنت في الحفلة وغنيت .. يمكن هو مش فاكر الموقف ده حتى بس أنا فاكره وله أن كان إنسان قبل ما يكون فنان وروحت طاير من الفرحة ونمت في بيتى مبسوط وليه موقف تانى هحكيه في وقت تانى".
