فيل إبرهة

الحدث: مليونية لا العنف
المكان: رابعة العدوية
الزمان: قبل الزلزال بعشرة أيام..زلزال 30 يونيو
طبعا أنت متوقع أني أكملك بقية المشهد وأقولك نهار خارجي وليل داخلي والكلام دا.. لا المشهد من كتر ما اتكرر كتير قبل كدا من ناحية طريقة الحشد والأتوبيسات بتاعة الإخوان اللي جابتهم من كل حتة في مصر بقى ممل.. لكن اللي استفزني هو هتافات حبايبنا اللي شاركوا فيها.. طبعا اسم المليونية «لا للعنف» وكل هتافاتهم هي اضرب يا مرسي، خلص يا مرسي، واللي يفتي بجواز قتل المتظاهرين واللي يقوله لا تاخذك بهم رحمة ولا شفقة.. أمال إيه بقى حكاية لا العنف دي.. عموما هما دلوقتي بيحضروا طيرا أبابيل بحجارة من سجيل بعدما وصلتهم معلومة مؤكدة أن البرادعي راح الهند واشترى فيل.. والفيل أهداه للمتظاهرين عشان هيخدوه معاهم لهدم الكعبة اللي في المقطم.. لا أحد يدعو لمليونية اسمها نبذ العنف وهي كلها تطفح بالتحريض على العنف وقتل المتظاهرين.. وأين كل هذه الأعداد من حملة تجرد التي سمعنا عنها ولم نرها ولم تتحق أحلامي في أن أرى أحد متجردا!! وحتى لايفهمني أحد خطأ أقصد من حملة تجرد.. فلمَ لم تقم هذه الحشود بالتوقيع على استمارة تجرد.. أم أن التوقيع مجانًا ومفهوش بدل انتقال أم أن هذه الحشود هي فوتو شوب تطوع بها رجلهم في ماسبيرو بتاع ابقى تعالي وأنا أقلك وقام بتضخيمها.. عموما نرجو من إعلام ماسبيرو حتى يكون محايدًا أن يسلط الضوء أكتر على فيل إبرهة القادم لهدم كعبة الإرشاد ولا يصفهم بأصحاب أجندات أو بتوع كنتاكي!!