عارفة عبد الرسول عن محمد ممدوح تايسون: عبقري
نشرت الفنانة عارفة عبد الرسول عبر صفحتها الرسمية على فيس بوك بوست عبرت فيه عن حبها للنجم محمد ممدوح "تايسون" ودعما له ضد اتهامات رواد السوشيال ميديا أنه لديه مشاكل في مخارج الحروف واستشهدت بالنجم الراحل أحمد زكي الأسمر ذي الشعر الأكرت الذي كان لا يمتلك أي مقومات خارجية للنجومية ومع ذلك تألق وفرض نجوميته وموهبته على الجميع.
وكتبت عارفة: زمان لما ظهر أحمد زكي الدنيا قامت ما قعدتش.. إزاي الواد الأسمر الرفيع أبو شعر أكرت يسحب السجادة من تحت حسين فهمي ومحمود ياسين اللي شغالين جان بريميير الله ينور بقالهم أكتر من عشرين سنة.. ده مش سحب السجادة ده شدها من تحت رجلهم.. بافكر في حكاية النجم الأول الإسكندراني الله يرحمه كان سقط في اختبارات إذاعة إسكندرية عشان عنده السين بتصفر.. ورغم أنه بقى نجم كبير إلا أنه ما كانش قادر ينسى".
وتابعت عارفة: “أنا بقى تربية المدرسة دي بتاعة مخارج الحروف والتلوين في الأداء.. قوم يطلع لي فجأة ممثل مش السين بس اللي بتصفر ده كل حروفه فيها مشكله.. وأول ما أبتدي أبص عليه وأسمعه وأبتدي أقول تؤ تؤ.. ألاقيه يا خويا سحبني سحبة وشدني بطاقته وإحساسه ونظرة عين.. إيه ده مش بس شدني ده شد ناس كتير من اللي هما بتوع مخارج الحروف برضه وابتدوا من جماله يدوروا له على أعذار يقولوا.. عادي ما فيه ناس معانا لدغة مثلا فيها إيه لما يبقى الممثل ألدغ.. واللي يقول أنا باحس أنه طبيعي شبهنا ممكن ناكل الكلام ولا حتى نتهته مش مشكلة ما شفتوش فيلم.. كينج سبيش أو خطبة الملك.. افتكرت أحمد زكي اللي غير.. أنا مش مضطرة أقول الكلام ده لاحايغديني ولا يعشيني ولا فيه مصلحة بيني وبينه.. بس أنا فعلا بأحبه وحطاه في مصاف العباقرة.. باحبك حب خالص.. محمد ممدوح الشهير بتايسون".
