كابتن ماجد يكتب: نادي القرن
موقف الزمالك من لقب "نادي القرن" بيفكرنى بمشهد للفنان "توفيق الدقن" في فيلم "الشيطان يعظ" عندما قال بطريقته الساخرة المعهودة "هي الدنيا جرى فيها إيه.. هي كل الناس عايزة تبقى فتوات ولا إيه.. طب لما كلكم تبقوا فتوات.. أُمال مين اللى هينضرب يا آه يا آه" وكما فعل سعيد صالح "حنفى الأبيض" عندما طلب من توفيق الدقن "المعلم ماضى" أن يكون ضمن الفتوات راح الزمالك يطلب من الـ«فيفا» أن يحصل على لقب نادي القرن.. طب لما الزمالك يبقى نادي القرن.. يبقى إحنا هنسخر من مين بقا؟!!
الزمالك بيستف الأوراق ويعد الملفات اللى هيبعتها للفيفا علشان يؤكد أنه نادي القرن الأفريقى.. مع إن الاتحاد الأفريقى نفسه اللى هو الفتوة بتاع المنطقة قد منح اللقب للأهلي منذ 20 سنة يعنى بعد عشرين سنة يا إبراهيم يا أبيض جاى تقولى عايز أبقى الفتوة؟!.. طب ادينى أمارة طيب وطبعًا أخونا "فاروق جعفر" ومعه خالد الغندور ومعهم كل "المشاديد" الزمالكاوية ماشيين في كل حتة يهتفوا للكبير بتاعهم "اسم الله عليه اسم عليه.. رئيس نادي القرن اسم الله عليه".
عمومًا الفتونة مش بالكلام.. الفتونة بتتاخد بالشومة.. والشومة هنا هي التاريخ وعدد البطولات والإنجازات والجماهير الغفيرة وأشياء أخرى يقدرها مشايخ الـ«فيفا» وكبارات اللعبة.
