بعد تعافيه.. نائب مدير "النجيلة" يرد على مخاوف المصريين من الإصابة بكورونا
رد الدكتور محمد علام نائب مدير مستشفى النجيلة للعزل والمتعافي من فيروس كورونا على بعض الأسئلة التي ترد في أذهان المصريين عن الإصابة بفيروس كورونا المستجد كوفيد-19 وأعراضه ومتى يمكن الذهاب للمستشفى ونسبة المتعافين من المرض إلى جانب نسبة الوفيات.
وعن أعراض الإصابة بفيروس كورونا قال عبر فيس بوك: "كتتير جدا اتكلمنا فيها هما ٣ أعراض أساسية (ارتفاع درجة الحرارة مستمره فوق 38 - سعال جاف- الم بالجسم) ثم بعد ذلك ضيق بالتنفس".
وأضاف: "في أعراض تانية بتظهر في نسبه بتصل لـ ٥٪ لكن ما بتظهرش لوحدها (رشح بالانف - احتقان بالحلق -إسهال وألم بالمعدة- سعال ببلغم بدل جاف – صداع - فقدان حاسة بالشم والتذوق) بكرر ما بيجوش لوحدهم لازم عرض من الكبار ولو لوحدهم فرشح الأنف والسعال أعراض برد أكتر منها كوفيد".
نائب مدير مستشفى النجيلة: الماسكات القماش تحمي من كورونا بشروط | فيديو
أما عن إمكانية ظهور الأعراض كلها مرة واحدة وفترة حضانة الفيروس فقال "فترة الحضانة من يوم لـ ١٤ يوما لكن في المتوسط ٣ لـ ٧ أيام.. مش كل الأعراض بتظهر. أساسا ممكن مفيش أعراض تظهر خالص وما تعرفش وممكن يظهر عرض واحد زي ارتفاع درجة الحرارة يوم أو اتنين مع شوية ألم في الجسم والموضوع ينتهي وممكن اكتر من عرض بتختلف من شخص للتاني".
وعن فترة التعافي من الفيروس أو حدوث وفاة قال علام: "بدون أعراض بيخف بعد أسبوعين، أعراض بسيطة بيخف بعد ٣ اسابيع تقريبا، حالة حرجة من ٤ لـ ٦ أسابيع.. الوفاة نسبة قليلة ومفروض ما كنش داخل على المرض ومستنى الوفاة لكن بتحصل بعد ٣ أسابيع من الإصابة تقريبا".
وعن حدوث الوفاة فجأة بالفيروس قال: "الوفاة لمصاب الكوفيد بتحصل بعد مرور وقت من الإصابة، من الإصابة لظهور الأعراض متوسط ٥ أيام وبتبدأ أعراض خفيفة ثم تزيد علشان يدخل في ضيق تنفس والتهاب رئوي تقريبا أسبوع وعلشان الحالة تسوء بردوا محتاجة من ٣ أيام لأسبوع هنا ممكن تحصل الوفاة يعني من أسبوعين لـ ٣ من ظهور الأعراض".
وعن الوقت الذي يجب الذهاب للمستشف لعمل فحص قال: "ده أهم سؤال ظهرت أعراض وأنت بتخرج للشغل وبتختلط مع الناس يبقى لازم تكلم ١٠٥ أو تروح الحميات أو الصدر نطمن يعني مفيش حد يكون تعبان بقاله أسبوعين ولسه رايح يفكر يروح يكشف لما حالته بقت سيئة من بداية ظهور الأعراض أروح وهما هيوجهوني صح أو اكلم ١٠٥".
وأضاف: "نصيحة أول ما تشك وتظهر أعراض البس كمامة إجباري وابعد عن أهلك لحد لما تطمن أنت لو شاب الموضوع هيمر عليك ببساطة لكن الناس الكبار هيبقى أصعب".
وعن مضاعفات فيروس كورنا قال علام: "الأرقام بتتغير كل يوم لكن للأحسن على فكرة يعني إيه الكلام ده!! أول الصين ما طلعت أرقام على عدد حالات ٧٢ ألفا وقالت ٨٠٪ أعراض بسيطة و٢٠ ٪ فقط هيدخلوا فى مضاعفات و٥٪ بس اللي هيكملوا لحالات حرجه.. لكن بعد كده ظهر أن في حالات بدون أعراض ما لهمش إحصائية مش هعرف عددهم كلهم".
وأضاف: "يعني بعد انتهاء الوباء احتمال نسبة الوفيات نلاقيها أقل من ١٪ عادي جدا أو أزيد الله أعلم فمش هتكلم في أرقام في الحتة دي لأنها كلها اجتهادات شخصية علشان محدش عارف العدد الكامل".
وتابع: "ببساطة دلوقت عندنا حالات بدون أعراض هيخفوا بدون أي تدخل وغالبا مش هيعرفوا غير بالصدفة انهم مصابيين. وحالات باعراض منهم ٨٠٪ حالات بسيطه لا تتعدى دور البرد وفقط ٢٠٪ محتاجين مستشفى ودول اللى لازم الحقهم بدرى ومنهم ٥٪ الحالات الحرجه اللى هيبقى فيهم الوفيات".
وعن نسبة الوفيات بالفيروس في مصر قال: ده سؤال مهم نسبه الوفيات فى دول لا تتعدى ١٪ وفى دول ١٢٪ ليه الاختلاف ده ببساطه وبدون تعقيد عندنا ٤ عوامل بيتحكموا فى نسبه الوفيات:
١- عدد المسحات وهل بعتمد على بروتوكول عمل مسحه للشخص اللى عليه اعراض ولا لكل المخالطين (دول العالم كلها معتمده على الشخص اللى عليه اعراض ايطاليا المانيا اسبانيا كلهم علشان كده نسبه الوفيات عاليه ما عدا بعض الدول زى السعوديه معتمده على مسح لكل المخالطين) توضيح منظمة الصحة العالمية معتمده على على مسحه للشخص اللى بيظهر عليه اعراض .
٢- متوسط عمر المواطنين كل لما يزيد عدد الناس الكبار بمشاكل صحيه بيكون الوفيات اكتر.
٣- اهم سبب من رأيي وأقلهم تكلفه وافضلهم تاثير تطبيق التباعد المجتمعى صح يعنى انا عارف ان الخطوره على كبار السن وأصحاب الأمراض المزمنه لو امنتهم ومنزلوش واتعاملت معاهم بحذر وامنت نفسي وانا خارج وداخل عليهم مش هيحصلهم حاجه فمش هيحصل وفيات كتيير وهلاقى النسبه لا تذكر.
٤- قدرة المنظومه الصحيه فى البلد لو عدد الحالات بقى ازيد من طاقتها الاستيعابيه هنا هتحصل وفيات اكتر من الطبيعى.
واختتم علام بنصيحة قال فيها: "نصيحه اخيره ومهمه “التزموا واهتموا الموضوع بسيط لو إلتزمنا هيبقى للأسف صعب وهنخسر كلنا لو استهتارنا. نخاف ماشي لكن منوصلش لمرحله الرعب اللى يخلينا منعرفش نتصرف او تصرفاتنا تكون غلط".
