تجيبها كده تجيبها كده هى كده

نكمل بقى ونشوف باقى فئات الشعب المصرى مزعلين المرشد والإخوان ليه وطبعاً لما يزعلوا المرشد معناها مزعلين الريس شخصياً.
القضاة مابيسمعوش الكلام يقولوا لهم ثور يقولوا احلبوه وماشيين خلف خلاف، مفروض يسيروا خلف المرشد والجماعة وينفذوا رغباتهم وملعون أبو القانون اللى عاملينه حجتهم.

واقفين لهم زى اللقمة فى الزور ومعطلين مشاريع الأخونة والسيطرة، بداية من مجلس الشعب اللى اتحل والإعلان اللا دستورى وحصار المحكمة الدستورية ونيتهم استبعاد ٣٠٠٠ قاض حسب كلام مرشدهم السابق.. فيها إيه لما الريس شال النائب العام وعين واحد على مزاجه .. إيه سبب الاعتراض مش البلد بتاعتهم والدفاتر دفاترهم والحكومة حكومتهم.. وأخيراً قانون السلطة القضائية اللى حايموتوا يسلقوه فى السريع وكأن مصر حلت كل المشاكل والبلاوى وربنا يستر على المحكمة الدستورية نفسها.

أما شلة المثقفين والفنانين مش عاجبهم إن وزير الثقافة دخل حامى من أول يوم وناول استمارة ستة لكل قيادات وزارته أول هام كلهم من العهد البائد، يعنى كلهم اتولدوا وعاشوا عصر السادات وحسنى مبارك يبقوا فلول.. ثانى هام اتجرأوا وقالوا رأيهم فى الوزير، طب من إمتى حد يقدر يفتح بقه على واحد من الجماعة اللى هى تاج راسنا وبترأسنا، وأى حد ينتمى لها يبقى أبو العريف ومافيش زيه.. والنبى أوبرا إيه وفنون تشكيلية إيه ولا المصيبة فى الباليه اللى بيشجع على الفسق والفجور.

كل شىء ماشى بتعليمات المرشد لا تقولى قوة ناعمة ولا قوة خشنة تجيبوها كده تجيبوها كده هى كده وهو فكرهم كده وكل إناء ينضح بما فيه.

موضوع العرى والفسق والفجور يجرنا لموضوع المرأة وكره الإخوان لها، مش معترفين إلا بالست باكينام الشرقاوى.. مصر لا كان فيها سهير القلماوى ولا عائشة راتب ولا مفيدة عبدالرحمن ولا أم كلثوم ولا بنت الشاطئ ولا… ولا ….. هى باكينام الشرقاوى وبس.

وبالمناسبة هى نسيت تقول للمجتمعين فى جلسة الحوار الوطني حول سد النهضة إن الحوار مذاع على الهوا، خلاص جل من لا يسهو.
ثم إنه لا هى ولا رئيس ديوان رئيس الجمهورية ولا مسئول الإعلام من الرياسة كانوا عارفين أن المجتمعين حايفضفضوا كده ويفتحوا على الرابع، معلش حصل خير حا ياخدوا بالهم المرة الجاية.

الشعب المصرى كله ظالم ومفترى طول النهار يسأل فين مشروع النهضة، المشروع كان تمام التمام لكن نعمل إيه فى الفلول والنظام البائد واللهو الخفى والصوابع اللى بتلعب فى البلد، والريس عارف كويس قوى مين بيقول إيه وبيعمل إيه إمتى وليه.. كل ده وعايزين يبقى فيه نهضة، على العموم ماتزعلوش أهى إثيوبيا شربت دم مرسى وعشيرته وقامت باللازم بس بدل ما يبقى مشروع النهضة بقى سد النهضة.. وبدل ما النهضة تبقى فى مصر ما جراش حاجة حانخليها فى الحبشة، وادى إحنا قلنا إخوان وولاد القارة السمراء.