"خليك في البيت".. قصيدة جديدة للشاعر ميسرة صلاح الدين | فيديو

خليك في البيت ! بعد اليوم الأول ... بعد اليوم التاني ... بعد الكاس الرابع ... اقلع هدومك كلها حته حته، وارقص! ارقص قدام التاج الأخضر مع صورة ليلى مراد، وعزيزة جلال، وزينات علوي. صوت الضلمة بيعلى، والعصافير صاحين بلليل على غير العادة.

بعد الكاس الخامس نادية لطفي هتقولك: "الهم واحد والملل مشترك" متعبرهاش، وخد قطمة كمان م التاج، وكمل رقص. الليل مش عارف يعمل ايه ويّاك مش عارف يستر عرضك.. يستر جسمك.. يستر روحك.. اللي اتعرت قدام مخلوق من أرقام ورموز. قطمة كمان شفطة كمان والروح بتروح والأفكار بتسيل والدمع طوفان طالع من حدوتة ظهرت فجاة هناك وأنت متعرفش .. أو تعرف تعرف إن المضبوط علة موجة سامية جمال ومديحة كامل مبيجبرش بخاطر حد.

اليوم السابع.. وسط تحية وشفايف فريدة فهمي وحاجات من هدى سلطان خلص الزتون وخلص زمن الكرامات والأرقام بتزيد. الليل مش عارف يعمل ايه وياك تقدر تنزل ع الأرض براحتك بعد خلاص ما اتعمّدت بنار الحرمان تقدر تسقط تسقط من جواك وتسقط من حساباتك ضحكة شادية و"عيون القلب" اللي نجاة مش بتغنيها عشانك ارقص هز هز كمان مش فاضل غير أخر شفطة مش فارق لو  كانت  فودكا رخيصة أو منقوع مهرجانات غير معلومة المصدر قولي اعمِلْك ايه "قولي عمَلّك ايه" اغسل ايدك اغسل روحك اغسل عقلك لو شاطر نط من الجنة وخد باقي التفاح ويّاك "ويّاك.. ويّاك.. أنا راضي يا حبيبي برضاك" أنا مش راضي عن حاجة الدنيا بتتغير الدنيا مبتغيرش.

فات عشرين ثانية.. مش عارف على ايه. هو اللي بيحصل ده حقيقي؟ أنا ممكن اعتبر إني كتبت قصيدة جديدة أو ممكن اعتبر إني سكرت.. الاتنين سيان، والموضوع مش فارق خالص مع حد. والأرقام بتزيد…