إسماعيل ياسين في شهر رمضان: أين أنت يا صلاة التراويح.. أين أنت يا موائد الرحمن

آه يانى يا قليل الحيلة، إننى أشعر بالانحباس.. ما هذه الحبسة السوداء.. دخل علينا شهر رمضان بقاله يومين.. وحصل اللى لا كان على الخاطر ولا كان في الحسبان، تعالى يا عم رمضان وادخل علينا برجلك اليمين والنبى، معلش بقا السنا دى مش هنعرف نستقبلك بالسحور على عربيات الفول، ومافيش وحوى يا وحوى ولا حتى إيوحا.. فكلنا محبوسين يا نور العين.

أنا طول عمرى بسمع إن الشياطبن بتتحبس وتتسلسل في شهر رمضان، لكن دى أول مرة هشوف البنى الآدمين وهما محبوسين في رمضان، آه يانى يا محبوس يا سمعمع، إلهى يحبسك في أوسخ كراكون يا أيتها الكورونا الملعونة، أين أنت يا صلاة التراويح.. أين السهرات الرمضانية وأين الألعاب النارية.. الحقنى يا عفركوش يا ابن برتكوش يا ساكن الفانوس.. يعنى يا ربى ما فيش تراويح ولا حتى سهرات رمضانية وكل حاجة هتبقى منزلية؟!.. وكمان مافيش فانوس علشان مافيش فلوس، آه يا شلاضيمى يانى يا مااااما. 

إننى أشعر بالإزبهلال.. أين أنت يا موائد الرحمن.. ده إحنا غلابة قوى يا عمى، حتى موائد الرحمن لن تكون موجودة في هذا الشهر، يعنى مضطرين نفطر في البيت 30 يوم، فلن تكون هناك عزومات ولا أي خروجات، وكل دا عايز مصاريف زيادة وإحنا الكورونا خلتنا بنكُح تراب.. الله يرحم الأيام اللى كان كل شارع من شوارع المحروسة به مائدة رحمن، وكان الواحد ياخد العيال وكل يوم يفطر في بيت شكل.

آه يا مين يعزمنى أنا والعيال وأمهم لمدة تلاتين يوم وله عليا آخد له زيارة كلها كمامات وماسكات وجاونتيات، ولن يسمع منى أي عطسات ولا سعالات، وياريت يجيب لنا لبس العيد وإحنا مروحين وله منا جزيل التشكرات.

عموما كل سنة وأنتم طيبين وللعرق سوس شاربين.، ويجعلنا وإياكم من المعتوقين، في شهور رمضان الجايين، ويحفظنا من الكورونا وكافة الفيروسات الملاعين، ورمضان كريم علينا وعليكم وعلى كافة المصريين، صوما مقبولا وسهرات رمضانية منزلية سعيدة، ويلا بقى.. سلامو عليكوووووووووووووو.