ابنة الممثل الهارب شومان: "بتعمل دعاية لفيلمك على قفانا.. إنت مش أبويا وهشيل اسمك من البطاقة" | فيديو
نشرت لوجين شومان ابنة الممثل الهارب محمد شومان مقطع فيديو صادم ترد خلاله على البيان الذي أصدره والدها يطالب فيه بإنقاذ أسرته والإفراج عن ابنه بدون أي شروط.
وقالت ابنة "شومان" في الفيديو الذي بثته على موقع التواصل الاجتماعي "فيس بوك" في رسالة لوالدها: "إحنا مش أسرتك فكل ما يجمعنا بك هو وجود اسمك في الرقم القومي.. وليس لنا أي علاقة أو صلة بك وقطعنا علاقتنا بك منذ 5 سنوات".
وأضافت: "ابنك اللي إنت بتناشد السلطات الإفراج عنه إنت ليس لك به أي علاقة لأنك تركته وهو يبلغ من العمر عامًا ونصف وإنت لست مسئولًا مننا أو علينا.. فأمنا هي رب أسرتنا والمسئولة عننا وعن أحمد اللي طلبت الإفراج عنه وإنت لست مسئولًا عننا ولا مننا ولم نطلب منك هذا".
ووجهت رسالة لوالدها الفنان قائلة: "تكلم عن ابن أخوك وأخوك ولا تتحدث عن أخي فهو رهن التحقيق للتأكد بأنه ليس له علاقة بك وإنت لا تتدخل أرجو.. وإذا كنت عايز تبقى مسئول عننا تعالى انزل ولكن لا تجلس فى بلد تانية وتتكلم باسمنا وحاولنا كتير إقامة دعاوى قضائية لحذف اسمك من بطاقتنا ولكننا فشلنا وبنوجه رسالة للسلطات أنهم يساعدونا ونتبرأ تمامًا منه وأرجوك لا تتحدث عننا ولا تصدر بيانات وإحنا عارفين أن إنت بتعمل ده علشان نفسك".
وتابعت: "إنت بتتكلم عن فيلم وبتعمله دعايا على قفانا.. مش عارفة أقولك إيه الحقيقة.. إنت بتقول إن إحنا بنموت بالبطيء، ووجودك أذى لينا.. إحنا موجودين هنا بإرادتنا.. مفيش أذى من الدولة علينا.. وجودك هو الأذى الوحيد في حياتنا.. إحنا هنا علشان عاوزين نفضل هنا ومن غيرك".
