إسماعيل ياسين في وزارة التعليم: الرحمة من عندك يا خالق الكون

آه يانى يا سمعمع يا أبو الأكواد.. ده أنا دماغى هتدشدش ولا أدرى ماذا أريد أو ماذا أفعل أو كيف أكون، وهل أنا ولى أمر أم أننى مجرد زبون.. شلاضيم بُقى هتتفرتك من كثرة التفكير، دا كل شوية ألاقى تليفون من مُدرسى الفصول بتاعت العيال وبيكلمونى عن الأبحاث والأكواد، وكل واحد منهم يقولى ماتشغلش بالك يا عم "سمعة"..إحنا هنعمل كل حاجة.. وكله لله في لله كده من غير أي حاجة، طب ياخويا لما أنت هتعمل كل حاجة يبقى إيه لازمة المدعكة اللى إحنا فيها دى.. إنها إرادة الوزير. الرحمة من عندك يا خالق الكون.. ده إحنا يادوب بنكُح كورونا، والوليه بتقولى إن البحث بـ 200 جنيه.. إضربهم بقا في 15 بحث يا نور العين.. وأنا قاعد احسبها بقالى يومين.. (كود + كود = كودين.. وعليهم كود علشان الولد والبنتين.. والبحث انا اعمله إمتى وفين.. قالوا بيتباع.. أنا قلت أروح اشترى بحثين.. اتاريهم خمسة عشان يخزوا العين.. يعنى 15 بحث للولد والبنتين.. واضرب ياخوى كده في 200.. كود + كود = كودين.. وعليهم كود علشان الولد والبنتين)"

آه يا أنفُخى الذي يكاد أن يخرج من أدمُغى.. يعنى يا ربى العيال اللى يادوب بتفك الخط دى هيعملوا أبحاث إزاى وفين وإمتى ومع مين.. هو إحنا في حظر ولا ممكن عادى نروح ندور على المدرسين.. أم أننا هنشترى الأبحاث ونخلص من التوهة وطلوع العين.. والنبى ياخويا انا مازلت لا أفهم شيئا.. كل اللى اعرفه من المدرسين إن التلاميذ هتشترى أبحاث جاهزة وبمعرفتهم طبعا، طب أنا أجيب الفلوس دى كلها منين.. ده إحنا بنقول عشانا عليك يارب وعايشينها بالضالين.. ده بالإضافة إلى أننى مش لاقى أي مبرر لكل هذه التوهة يا سيادة وزير التعليم والمتعلمين.. ده إحنا كلنا من الكورونا مستخبيين.. يبقى إزاى أولادى هيحتكوا بزملائهم وبالمدرسين.. والنبى بلاش نظام الحاجة وعكسها يا نور العين.. ويلا بقى علشان ألبس الكمامتين.. سلامو عليكوووووووووووو