بسبب الكورونا.. أحمد مالك: "تايه ومتلغبط وبعترف إني مش فاهم"
كشف الفنان الشاب أحمد مالك عن رأيه في أزمة فيروس كورونا المستجد، والتي يعاني منها العالم بأسره، وسط قرارات من الحكومات بضرورة الالتزام بالإجراءات الوقائية، للحد من انتشار الفيروس.
فى هذا السياق قال مالك، عبر حسابه الرسمي على موقع التدوينات القصيرة “تويتر”: "كنت ناوي أكتب حاجة فيها هزار عن الفلوس والحالة المادية، بس لاحظت إني مش في أزمة قوية زي ناس فعلا حياتها ممكن تكون في خطر بسبب الوضع الحالي.. بعدين فكرت في الوضع الحالي.. أنا حاسس إني ما عنديش حاجة أقولها أو أعملها، ومش قادر حتى أقول لنفسي أعمل إيه".
وتابع “مالك” في تغريدة أخرى: "حاسس إني تايه ومتلخبط بس حاسس إني مش لوحدي وده شعور غريب بشكل حلو.. حاسس إني عايز أفضل ساكت وأتفرج.. مش عايز أجري، مش عايز آخد كورس أونلاين، مش عايز أعمل أي تحدي، مش عارف عايز أو مفروض أعمل إيه.. أنا بعترف إني مش فاهم حاجة".
وأضاف قائلاً: "عارف إن كلامي ممكن يميل للضلمة بس حاسس إن دي مش مشكلة ومش مفروض تخوفني.. حاسس إن دي مرحلة نادرة الإنسانية بتعدي بيها وكلنا جزء منها.. العالم في حالة صمت، صمت له صوت أنا مستغرب ومستمتع بقوته.. أنا ما عنديش حاجة مضطر أعملها أو أقولها غير إني أتأمل اللحظة دي وألاقي نفسي وسطيها".
اختتم مالك حديثه كاتبا: "مش عارف لو العالم هيتغير أو لا بعد اللي بيحصل، بس أكيد هنفهم حاجة جديدة وحتى لو مفهمناش أكيد هنحس.. أتمنى الخسارة تكون خفيفة علينا ومتحمس لليوم اللي هنحتفل فيه بمرور كل ده".
