يامُصيفين !!

السنة دي هيبتدي الصيف واجازة الصيف بعد امتحانات الثانوية العامة بمظاهرات وبعدين هيدخل علينا رمضان حيث الناس كلها هتكون صايمة ولا داعي لتبويظ الصيام بلعب ولهو المصايف وبعدها العيد وبعد العيد المدارس تاني
يعني من الواضح كده أن المصيف السنة دي مضروب ولا حد هيشوف مياه مارينا ولا شرم الشيخ هتعمر الا من الاجانب الآلاف ، اللي قالوا عليهم امبارح في التليفزيون المصري واللي جم كلهم كده مرة واحدة على مصر ، وهما عارفين انهم هيقضوا وقتا ممتعا قبل يوم 30 يونيو ، وفي هذه الحالة فإني اقترح أن يتم عمل حمامات سباحة كبيرة في كل الميادين قبل 30 يونيو ، لأن من حقوق الشعب المصري " البلبطة " وهو حق اصيل حتي اسألوا عبد الحليم حافظ ، اللى حط ابوه فوق الشجرة مخصوص عشان يسافر إسكندرية " يدق الشماسي من الضحي لحد التماسي "
والحمام اللي عند قصر الاتحادية ، يتم السماح فيه بلبس المايوه قطعة واحدة ، اما حمام " النهضة " فغير مسموح الا بالمايوه الشرعي .. 
وبكده يبقي الشعب كله صيف وأخد حقه تالت ومتلت .