ساخرون.. كابتن ماجد: أشد في شّعرى يعنى؟!
هو أنا بس عندى سؤال محيرنى.. هل اللاعب اللى بيلعب 16 مباراة ويسجل فيهم 3 أهداف فقط ده يبقى مهاجم سوبر يعنى كما تروج إدارة النادي الأهلي، أم أن الأهداف الثلاثة دى ممكن يجيبهم "عمرو السولية" من 3 شوطات وهو جاى من منتصف الملعب للتمنتاشر يتمختر ويتبختر؟!
التقارير بتقول إن المهاجم السنغالى "أليو بادجى" لاعب "رابيد فيينا" النمساوى والذي تعاقد معه النادي الأهلي مؤخرا لم يسجل خلال 16 مباراة إلا ثلاثة أهداف فقط.. يعنى نسخة طبق الاصل من "أزارو" مهاجم الأهلي الحالى.. طب ياريت يطلع زى أزارو ويبقى هداف الدوري الموسم القادم وبلاش الموسم ده هنعتبره موسم للتعارف.. ورغم أنه هياخد فيه 750 ألف يورو برضه.. يعنى نحو 12 مليون جنيه.. حاكم أن بابجى هياخد مليون جنيه في الشهر لمدة 4 سنوات باعتباره المهاجم الفلتة اللى مافيش منه في سوق المهاجمين
ده مروان محسن اللى هو مروان محسن اللى مالوش أي تلاتين لازمة بين مهاجمي العالم بيسجل اكتر من كده بكتير رغم أنه بيلعب بكام ألف في الشهر ومستحمل بهدلة الجماهير له عمال على بطال
يا أيها السادة.. بلاش نضحك على بعض.. ده لاعبي الوسط في الأهلي بيسجلوا اكتر من كده.. أنتم ليه مش مصدقين ورايحين تتعاقدوا بكل هذه الملايين.. أشد في شعرى يعنى؟!
